ދުނިޔޭގެ ސިއްހަތު ދުވަހާއި ގުޅިގެން މިނިސްޓަރު ނަސީމް ދެއްވި ހިތާބުގައި ވިދާޅުވީ ރައްޔިތުންނާއި ގާތުން ސިއްހީ ހިދުމަތްދީ ސިއްހީ ރައްކާތެރިކަން ދުރާލާ ކަށަވަރު ކުރުމުގެ ތެރެއިން މިހާރާއި ކުރިމަގުގެ ޖީލުތަކުގެ ސިއްހީ ދުޅަހެޔޮކަން ކަށަވަރުކުރުމަށް، ޕްރައިމަރީ ހެލްތުކެއާގެ އައު މަޝްރޫއެއް މުޅި ގައުމުގައި ފެށިގެންދާނެ ކަމަށެވެ.
ވެކްސިން ޕްރޮގްރާމް އިތުރަށް ހަރުދަނާ ކޮށް ކޮރޯނާ ވައިރަހާއި އެނޫންވެސް ގައުމީ ވެކްސިން ޕްރޮގްރާމްގެ ތެރެއިން ދެވޭ ވެކްސިންތައް ކަށްވަރު ކުރެވިގެންދާނެ ކަމަށާއި ސިއްހީ ކުއްލި ނުރައްކަލެއް އަދި އެފަދަ އެހެން ކާރިސާއަކަށް ތައްޔާރުވުމުގެ ގޮތުން، ދާއިމީ ކަރަންޓީނު ފެސިލިޓީތައް ގާއިމު ކުރުމާއި، މިހާރު ރާއްޖޭގެ އެކި ހިސާބުގައި ގާއިމު ކުރެވިފައިވާ ކޮވިޑް ފެސިލިޓީތައް ކުރިމަގުގައިވެސް ބޭނުން ކުރެވޭނެހެން ބައްޓަންކޮށް ދެމެހެއްޓޭނެ ކަމަށް ވެސް ހެލްތު މިނިސްޓަރުގެ ވާހަކަފުޅުގައި ފާހަގަކުރެއްވި އެވެ.
ކޮވިޑް އިޖާބައިގެ ތެރެއިން އަދި ކޮވިޑް ވެކްސިން ޕްރޮގްރާމުގެ ތެރެއިން އެއްކުރެވިފައިވާ ޒާތީ ސިއްހީ މައުލޫމާތުތައް ޑިޖިޓަލް ޑޭޓާ ބޭސްތަކުގައާއި އެފަދަ އެހެނިހެން ޕްލެޓްފޯމްތަކުގައި ރައްކާތެރިކަމާއިއެކު ބަލަހައްޓާ، އެ މައުލޫމާތުތަކުގެ އަލީގައި ރައްޔިތުންނަށް ދެވޭ ސިއްހީ ހިދުމަތްތަށް އިތުރަށް ތަރައްގީ ކުރެވޭނެ ކަމަށް ވެސް މިނިސްޓަރު ވިދާޅުވި އެވެ.
ސިއްހީ ހިދުމަތްތައް އެ ފެންވަރަށް ތަރައްގީ ކުރުމުގައި، ރާއްޖޭގެ ހާރިޖީ ގުޅުންތަކުގެ ތެރެއިން އެކުވެރި ގައުމުތަކާއި ދެމެދު އޮންނަ ގުޅުންތައް އަދި ބައިނަލް އަގްވާމީ ސިއްހީ އިދާރާތަކާއިއެކު އޮންނަ ގުޅުންތައްވަނީ އިތުރަށް ބަދަހި ކުރެވިފައި ކަން ފާހަގަކުރައްވަމުން މިނިސްޓަރު ވިދާޅުވީ އެފަރާތްތަކުން ރާއްޖޭގެ ސިއްހީ ދާއިރާގެ ތަރައްގީއަށް އަދި ވަކިން ހާއްސަކޮށް "ކޮވިޑް އިޖާބަ" އަށް ދެއްވަމުންގެންދަވާ އެހީތެރިކަމަށް ޝުކުރުވެރިވާ ކަމަށެވެ.
މީގެ އިތުރުން މިނިސްޓަރު ވިދާޅުވީ އެންމެ ހާއްސަ ގޮތެއްގައި، އަދި ފަހުރުވެރިކަމާއިއެކު ފާހަގަކޮށް އެފަރާތްތަކަށް ހިތުގެ ފުންމިނުން ޝުކުރު ދަންނަވަން ބޭނުންވަނީ، ކޮވިޑްގެ މަސައްކަތުގައި ހަރަކާތްތެރިވެފައިވާ އަދި މިހާރުވެސް ހަރަކާތްތެރިވަމުންދާ ސިއްހީ ހިދުމަތްތެރިންނާ، ވޮލަންޓިއަރުންނާ އަދި ޖުމްލަގޮތެއްގައި ފްރޮންޓްލައިންގައި މަސައްކަތް ކުރާ އެންމެހާ ފަރާތްތަކަށް ކަމަށެވެ.
ފެންވަރު ރަންގަޅު ސިއްހީ ހިދުމަތްތައް ހަމަހަމަކަމާއިއެކު ގާތުން ފޯރުވައިދީ ދުޅަހެޔޮކަން ކަށަވަރުކުރުމަށް ސަރުކާރުން ކުރާ އުއްމީދީ މަސައްކަތްތަކުގެ މަންފާ ރައްޔިތުންނަށް ލިބެމުންދާނެ ކަމަށާއި އެ މަސައްކަތުގައި މާތް ﷲ ބަރަކާތް ލެއްވުންއެދޭ ކަމަށް މިނިސޓަރު ވިދާޅުވި އެވެ.
ސިއްހީ ދުޅަހެޔޮކަމާމެދު އަބަދުވެސް ފަރުވާތެރިވުމަށާއި ކޮރޯނާ ވައިރަސްގެ މި ހާލަތުން އިބްރަތް ލިބިގަތުމަށާއި ސިއްހަތަކީ ހާސް ނިއުމަތެއް ކަމަށް އަދި އެ ނިއުމަތަށް ޝުކުރުވެރިވެ ދުޅަހެޔޮ ދިރިއުޅުމަކަށް އަހުލުވެރިވުމަށް މިނިސްޓަރު ނަސީމް ވަނީ އިލްތިމާސް ކުރައްވާފަ އެވެ.
