އިލެކްޝަނުން މިއަދު އެޑްވައިސަރީ ކޮމިޓީއާއެކު ބޭއްވި ބައްދަލުވުމުގައި ވާހަކަ ދައްކަވަމުން ޝަރީފް ވިދާޅުވީ، ދިއްފުށީގައި ވޯޓު ލުމުގެ ހައްގު ލިބިގެންވާ 710 މީހަކު ތިބި ކަމަށެވެ.
އޭގެ ތެރެއިން އާންމު ހާލަތުގައި ތިބީ 200 މީހުން ކަމަށާއި، ބާކީ 510 މީހުންނަކީ ކަރަންޓީނުގައިތިބި ނުވަތަ ޕޮޒިޓިވް މީހުން ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ 200 މީހުން ވޯޓު ލުމަށް ހެނދުނު ހަތަކުން ފެށިގެން ފަހަކަށް އަދި 500 މީހުނަނަށް ފަހަކުން ހަޔަކަށް ވޯޓު ލާން ފުރުސަތު ދިނުމީ އެކަމުގައި "އިމްބެލެންސް"ތަކެއް ހުރިކަމެއް ކަމަށެވެ. އަދި އީސީގެ އެޑްވައިސަރީ ކޮމިޓީއާއެކު، މިކަމާ ގުޅިގެން ކަރަންޓީނު ނުވަތަ ޕޮޒިޓިވް މީހުން ވޯޓުލާގަޑި ދިއްފުށީގައި އިތުރު ކުރުމާއި ގުޅިގެން މަޝްވަރާ ކުރައްވާ، ގޮތެއް ނިންމަވާނެ ކަމަށް ޝަރީފް ވިދާޅުވިއެވެ.
މިހާރު ވޯޓުލުން ކުރިއަށްދާނީ ކުރިން އިއުލާނު ކުރި ގަޑިއާއި އެއްގޮތުގެ މަތިން ކަމަށް ޝަރީފް ވިދާޅުވިއެވެ.
ނަމަވެސް އެޗްޕީއޭއިން ދިން ދޫތަކާއެކު، މިހާރު އެ އެއްގަޑިއިރުގައި ގިނަ ބަޔަކު ވޯޓުލާން އަންނާނެ ކަމަށްބެލެވޭ ކަމަށް ޝަރީފް ވިދާޅުވިއެވެ.
ކަރަންޓީނު އަދި ޕޮޒިޓީވްވެފައިވާ މީހުނަށް ވޯޓުލުމުގެ ކަންކަން ހަމަޖައްސާފައިވަނީ އެޗްޕީއޭ ގައިޑްލައިންގައިވާ ގޮތުގެ މަތިން ކަމަށް ޝަރީފް ވިދާޅުވިއެވެ. އަދި ފެލިވަރު ކަހަލަ ވޯޓުފޮށި ބަހައްޓާފައިނުވާ ރަށްރަށުން ކަރަންޓީނު އަދި ޕޮޒިޓިވް މީހުންނަށްވެސް ކައިރި ރަށްރަށް ވޯޓު ލުމަށް ދަތުރު ކުރުމަށް އެޗްޕީއޭއިން ހުއްދަ ދީފައިވާކަން ޝަރީފް ފާހަގަ ކުރެއްވިއެވެ.
މި ބައްދަލުވުމަށްފަހު ސީއެންއެމްއަށް މައުލޫމާތު ދެއްވަމުން ޝަރީފް ވިދާޅުވީ، އެއްވެސް ރަށެއްގެ އެއްވެސް ވޯޓުގަޑިއަކަށް ބަދަލު ނުގެންނަ ކަމަށެވެ.
