ރައީސް އޮފީހުގެ ތަރުޖަމާނު މަބްރޫކު އަޒީޒު ވަނީ ނައިބު ރައީސް ވޯޓު ލެއްވި ފޮޓޯ ތަކެއް ހިއްސާ ކުރައްވާ، އެމަނިކުފާނު ވޯޓުލެއްވިކަން ހާމަ ކޮށްފައެވެ.
ކައުންސިލް އިންތިހާބުގައި ވޯޓުލެއްވުމަށްފަހު ކުރެއްވި ޓުވީޓެއްގައި ނައިބު ރައީސް ވަނީ، އަހަރެމެން މި ދަތުރު ކުރަނީ ފުރިހަމަ ލާމަރުކަޒީ ނިޒާމަކަށް ކަމަށް ވިދާޅުވެފައެވެ.
މީގެ އިތުރުން، ރަށުގެ ތަރައްގީގައި އެންމެންގެ ބައިވެރިވުން މުހިއްމު ކަމަށް ނައިބު ރައީސް ވިދާޅުވިއެވެ. އަދި ރައްޔިތުންގެ އަޑު ލޯކަލް ކައުންސިލްގައި އުފުލާނެ ފަރާތެއް ހޮވުމަށް ވޯޓު ދެއްވުމަށް ނައިބު ރައީސް އެދިލެއްވި އެވެ.
މިއަދު ހެނދުނު ރައީސް ސޯލިހުގެ އިތުރުން، މަޖިލީޖުގެ ރައީސް ނަޝީދު އަދި ސަރުކާރުގެ އެކި މިނިސްޓަރުންވެސް ވަނީ ވޯޓު ލައްވާފައެވެ. އަދިހުރިހާ ބޭފުޅުންވެސް ވަނީ ވީހާވެސް ގިނަ ރައްޔިތުން ވޯޓުލާން ނިކުތުމަށް އެދިފައެވެ.
