އިންސާފުވެރި އިންތިހާބެއް ބޭއްވުމަށް ހުރަސްއަޅާ، ގާނޫނާ ހިލާފަށް ވޯޓަށް ނުފޫޒު ފޯރުވުމަށް ހިންގާ އަމަލުތައް ހުއްޓާލުމަށާ އެ މައްސަލަތައް ތަހްގީގްކުރުމަށް ގޮވާލާ އިދިކޮޅުން ނެރެފައިވާ ބަޔާނެއްގައި ވަނީ، ވޯޓުލުން ފެށިގެން ކުރިއަށް ދަނިކޮށް މިއަދު ރައީސް އިބްރާހީމް މުހައްމަދު ސޯލިހް ވަނީ ތާއީދު ހޯދުމާ ކެމްޕެއިނުކުރުމުގައި އަމަލުކުރަން ޖެހޭ އުސޫލުތަކާ ހިލާފަށް ރާއްޖޭގެ ގައުމީ މީޑިއާ މެދުވެރިކޮށް ވަކި ޕާޓީއެއްގެ ކެންޑިޑޭޓުންނަށް ކެމްޕޭނުކޮށްދެއްވާފަ ކަމަަށް ތުހުމަތުކޮށްފައެވެ. 

އަދި އެމްޑީޕީގެ ރައީސްއާއި އެ ޕާޓީގެ އިސް ވެރިންނާ ޕާލިމެންޓްރީ ގްރޫޕްގެ މެންބަރުން ވޯޓުލާ މަރުކަޒުތަކުގެ ސަރަހައްދުތަކުގައި ވަރަށް ފާޅުކަން ބޮޑުގޮތެއްގައި ގާނޫނާ ހިލާފަށް ކެމްޕޭން ހިންގާ، އިންތިހާބަށް ނުފޫޒު ފޯރުވައި، ވޯޓުލާންދާ ފަރާތްތަކަށް ބިރުދެއްކުމުގެ އަމަލުތައް ތަކުރާރުކޮށް ހިންގަމުން ދާ ކަަމަށްވެސް ތުހުމަތުކޮށްފައިވެއެވެ. 

އިދިކޮޅުން ވަނީ ވޯޓު ގަޑުބަޑުކޮށް ވޯޓު އޮޅުވާލާ ރައްޔިތުންގެ ހައްގުތަކަށް އަރައިގަތުމަށް މަގުފަހިވާގޮތަށް ހިންގަމުން ދާ މިފަދަ އަމަލުތައް ޑރ. މުއިއްޒުގެ ކެމްޕޭން ޓީމުގެ ފަރާތުން ކުށްވެރިކުރާ ކަމަށާއި، އެ އަމަލުތައް މިހާރުން މިހާރަށް ހުއްޓާލައި، އިންސާފުވެރި އިންތިހާބެއް ކަށަވަރުކޮށްދިނުމުގެ ގާނޫނީ ޒިންމާ އަދާކުރުމަށް ދައުލަތުގެ ކަމާބެހޭ އެންމެހާ މުއައްސަސާތަކަށް ވަކިން ހާއްސަކޮށް އިލެކްޝަންސް ކޮމިޝަނަށާ އެ ކޮމިޝަންގެ ރައީސަށް ގޮވާލާފައެވެ. 

މީގެ އިތުރުން ވޯޓުލުން މިއަދު ކުރިއަށްދާއިރު އިންސާފުވެރި އިންތިހާބަކަށް ހުރަސް އަޅައި އަދި ގާނޫނާ ހިލާފަށް ވޯޓަށް ނުފޫޒު ފޯރުވުމުގެ އެތައް އަމަލެއް ސަރުކާރު ހިންގަވަން ތިއްބެވި ފަރާތްތަކާ އެމްޑީޕީއިން ހިންގަވަމުން ގެންދަވާ ކަމަށް ތުހުމަތު ކުރައްވާ އެ ގައިރު ގާނޫނީ އަމަލުތައް މިހާރުން މިހާރަށް ހުއްޓާލުމަށާ، އިންތިހާބީ ހައްގުތައް ނަގައިލަން ހިންގާ އެކަންކަން މިހާރުން މިހާރަށް ތަހްގީގުކޮށްދިނުމަށް ދައުލަތުގެ ކަމާބެހޭ މުއައްސަސާތަކަށް ގޮވާލާކަމަށްވެސް އިދިކޮޅުގެ ބަޔާނުގައި ބުނެފައިވެއެެވެ