އެގޮތުން އެރަށަށް ޒިޔާރަތްކުރާ މީހުންގެ ލޮލުގައި އަޅައިގަންނަ އެއްތަނަކީ އެރަށުގައި ސަގާފީ މަގެވެ. އެމަގުގެ އެއްކޮޅުން އަނެއްކޮޅަށް ކުރަހާފައި ހުންނަ ސަގާފީ ކުރެހުންތަކަކީ ގިނަ ބަޔަކު ރިނބުދޫއަށް ޒިޔާރަތް ކުރަން ބޭނުންވާ އެއް ސަބަބެވެ.
ރިނބުދޫ ކައުންސިލްގެ ރައީސް ހާތިމް އިބްރާހީމް ސީއެންއެމް އަށް ވިދާޅުވީ އެރަށުގައި ތަރައްގީ ކުރަމުންދާ ސަގާފީ މަގަކީ ކައުންސިލުން ރަށް ތަރައްގީ ކުރުމުގެ ފްލޭންގެ ދަށުން ހިނގަމުން އަންނަ މަޝްރޫއެއް ކަމަށެވެ.
ރޯނު ވިޔާ މީހުންނާ، ގަހަނާ ހަދާ މީހުންނާ، ކާބޯތަކެތި ހަދާމީހުންގެ އިތުރުން އެކި ސަގާފީ ކަންކަން ކުރާ މީހުންނަށް އެއް މަގެއްގައި އެމީހުންގެ މަސައްކަތް ދައްކާލުމުގެ ފުރުސަތު ހޯދައި ދިނުމަކީ ކައުންސިލްގެ އަމާޒު ކަމަށް ހާތިމް ވިދާޅުވި އެވެ.
ސަގާފީ މަގުގެ ފާރުތަށް ކައުންސިލުން ނިންމާފައި ވަނީ ރިނބުދޫގެ ތާރީހު ކުރެހުންތަކެއްގެ ސިފައިގައި އެފާރުތަކުން ދައްކާލުން ކަމަށެވެ. އެ މަގަށް އެ ބަދަލު ގެނައުމުން ސަގާފީ މަގަށް އިތުރު ފުރިހަމަ ކަމެއް ލިބޭނެ ކަމަށާއި ގިނަ މީހުންގެ ސަމާލުކަން ވެސް ލިބިގެންދާނެ ކަމަށް ހާތިމް ވިދާޅުވި އެވެ.
ރިނބުދޫގެ ސަގާފީ މަގުގައި ސަގާފީ މަސައްކަތްތައް ދައްކާލުމުގެ ފުރުސަތު މިހާރު ވާނީ ރާއްޖޭގެ ހުރިހާ ފަރާތްތަކަށް ވެސް ހުޅުވާލެވިފައި ކަމަށާއި ކައުންސިލްގެ ޕްލޭނަކީ ރިނބުދޫ އާޓް ހަބެއްގެ ގޮތުގައި ތަރައްގީ ކުރުން ކަމަށް ވެސް ހާތިމް ވިދާޅުވި އެވެ.
ރިސޯޓްތަކުން އަންނަ އާޓިސްޓުންނާއި ރާއްޖޭގެ އެކި ކަންކޮޅުތަކުގެ އާޓިސްޓުންނަށް ވެސް ސަގާފީ މަގުގެ ފާރުތަކުގައި ކުރަހާލުމުގެ ފުރުސަތު އެތަ އޮތް ކަމަށް ވެސް ހާތިމް ވިދާޅުވި އެވެ.
ސަގާފީ މަގު
އާޓިސްޓުންނަށް އެމީހުންގެ މަސައްކަތް ދައްކާލުމަށް އާޓް ގެލަރީއެއް ވެސް ރިނބުދޫގައި ތަރައްގީކުރަމުން ގެންދާކަމަށް ހާތިމް ވިދާޅުވި އެވެ. އެތާގައި އާޓް އެގްސިބިޝަންތައް ބޭއްވިގެންދާނެ ކަމަށާއި ރިސޯޓުތަކުން އެ ކުރެހުންތައް ގަތުމަށް ފަތުރުވެރިން ވެސް އަންނާނެ ކަމަށް ހާތިމް ވިދާޅުވި އެވެ.
ހާތިމް ވިދާޅުވީ އެ ޕްރޮޖެކްޓް ދެމެހެއްޓެނެވި ގޮތެއްގައި ކުރިއަށްދާނީ އާޓިސްޓުންނަށް އަބަދު އެރަށަށް އައުމުގެ މަގު ތަނަވަސް ވެގެން ދިއުމުން ކަމަށާއި އޭރުން ފާރުތަކުގައިވާ ކުރެހުންތައް ވެސް ދެ އަހަރުން އެއް އަހަރު ބަދަލު ކޮށްލެވޭނެ ކަމަށެވެ.
އެ ސަރަހައްދަކީ މި ވަގުތު ރިނބުދޫގައި ހަރަކާތްތައް ހިންގަން އެންމެ ރަނގަޅު ހިސާބުކަން ވެސް ހާތިމް ފާހަގަކުރެއްވި އެވެ.
ހާތިމް ވިދާޅުވީ ނިމިދިޔަ އަހަރުގައި ސަގާފީ މަގުގެ މަސައްކަތް ނިމުނުތަނާ ކޮވިޑް 19ގެ ބިރުވެރިކަން ރާއްޖޭގައި ފެތުރި ދަތުރުފަތުކުރުން މެދުކެނޑިގެން ދިޔައީ ކަމަށެވެ. އަދި ރިސޯޓްތަކުން އެރަށަށް ޒިޔާރަތް ކުރަން ބޭނުންވި ޓޫރިސްޓުންނަށް ވެސް ނާދެވުނު ކަމަށެވެ.
ސަގާފީ މަގު
ނަމަވެސް މިދިޔަ އަހަރުގެ ފަހުކޮޅުގައި ސަގާފީ މަގުގައި ލޯކަލްސްއަށް ޓާގެޓްކޮށްގެން ހަރަކާތްތައް ވަނީ ހިންގާފައި ކަމަށާއި ވަރަށް ގިނަ މީހުން ރިނބުދޫއަށް ޒިޔާރަތް ކުރިކަމަށެވެ.
ކޮވިޑްގެ ހާލަތް ރަނގަޅުވުމާއެކުގައި ރިސޯޓްތަކުން ކޮންމެ ދުވަހަކު ރިނބުދޫއަށް މީހުން އަންނާނެ ކަމަށް ވެސް ހާތިމް ވިދާޅުވި އެވެ.
ހާތިމް ވިދާޅުވީ ސަގާފީ މަގުގައި މަސައްކަތް ސްޓޭޝަންތައް ހެދުމުގެ މަސައްކަތް ކުރަމުން އަންނަ ކަމަށާއި ރަށުގެ ހުރިހާ ރަށްޔިތުންގެ އިތުރުން މުޅި ރާއްޖޭއިން ވެސް އެއްބާރުލުން ލިބިގެން ދިޔަކަމަށެވެ.
ހާތިމް ވިދާޅުވީ ކުރެހުންތައް ކުރެހި އާޓިސްޓުން މަސައްކަތް ކޮށްފައިވަނީ ހިލޭ ސާބަހަށް ކަމަށާއި ދެމަސް ދުވަހުގައި އެ މަސައްކަތް ނިންމާލައިފައިވަނީ ބޮޑު ލާރިއެއް އަތުން ނުގޮސްކަމަށެވެ.
ހާތިމް ވިދާޅުވީ އެ މަސައްކަތުގައި އެސްޓީއޯއިން ވެދިން އެހީއާއި މޯޑިވިއަން އާޓިސްޓް ކޮމިއުނިޓީއިން ވެދިން އެހީގެ އިތުރުން ރަށުގެ ރަށްޔިތުންނާއި ޖަމިއްޔާ ޖަމާއަތްތަކުގެ އިތުރުން އާޓް އެންޑް ހެރިޓޭޖް މިނިސްޓްރީއަށް ވެސް ޝުކުރު ދަންނަވާ ކަމަށެވެ.
