މި ދެ ކޯޗުންވަނީ ގިނަ ދުވަސްތަކެއްވަންދެން އެކުގައި މަސައްކަތްކޮށް، އަދި ރާއްޖެއަށް ފުރަތަމަ ފަހަރަށް ސާފު ޗެމްޕިއަންޝިޕް ކާމިޔާބުކޮށްދީފައެވެ.
ޔުނައިޓެޑު ވިކްޓްރީ ގޮވައިގެން ސާންތީ ނުކުންނައިރު އެ ޓީމު އޮތީ ޓޭބަލްގެ އެންމެ ފުލުގައެވެ. މޮޅުވެފައިވަނީ އެންމެ މެޗަކުންނެވެ. އެހެންނަމަވެސް އެއީ އެ ޓީމު އެއްމެ ފަހުން ކުޅުނު މެޗެކެވެ. އަނެއްކޮޅުން ސުޕަރ ޔުނައިޓެޑް ގޮވައިގެން މޯހަން ނުކުންނައިރު އެ ޓީމު އޮތީ ފުލުން ދެވަނައިގައެވެ. ޔުނައިޓެޑް ވިކްޓްރީއަށް ބާރަ މެޗުން ހަ ޕޮއިންޓް ލިބިފައިވާއިރު، ސުޕަރ ޔުނައިޓެޑަށް ބާރަ މެޗުން ލިބިފައިވަނީ ބާރަ ޕޮއިންޓެވެ.
ސާންތީއާ މޯހަން އެކަކު އަނެކަކާ ދެކޮޅަށް ނުކުންނައިރު، މީގެ ކުރިންވެސް މި ދެ ކޯޗުންވަނީ އެކަކު އަނެކަކާ ދެކޮޅަށް ނުކުމެފައެވެ. ދެހާސް ބާރަވަނަ އަހަރު ނިއުރޭޑިއަންޓް ގޮވައިގެން މޯހަން ނުކުތްއިރު އެ މުޅި ސީޒަންގައިވެސް ނިއުރޭޑިއަންޓް ބަލިވި ހަމަ އެކަނި މެޗަކީ ސާންތީ އަތުން ބަލިވި މެޗެކެވެ. ސާންތީ އޭރު ހުރީ ކްލަބު އީގަލްސްގެ ކޯޗުކަމުގެ މަގާމުގައެވެ. ފަހުން މޯހަން ކޯޗުކޮށްދިނީ އީގަލްސްއަށެވެ. ދެހާސް ބާރަވަނަ އަހަރު މޯހަން ބަލިވި ހަމަ އެކަނި މެޗަކީ ސާންތީ އަތުން އެފްއޭކަޕުގެ ސެމީ ފައިނަލް މެޗެވެ. އެ ފަހަރު އެ މުބާރާތް ކާމިޔާބުކުރީ ސާންތީ ކޯޗުކޮށްދިން އީގަލްސްއެވެ.
މި ދެ ކޯޗުން މިދިޔަ އަހަރުގެ ތެރޭގައި އެކުވެރިކަމުގެ މެޗެއްގައިވެސް އެކަކު އަނެކަކާ ވާދަކުރިއެވެ. އެއީ ސާންތީ އޭދަފުށްޓަށް ކޯޗުކޮށްދިން އިރު އީގަލްސްއާ އޭދަފުށި، އޭދަފުށީގައި ކުޅުނު އެކުވެރިކަމުގެ މެޗެކެވެ.
ސާފު ޗެމްޕިއަންޝިޕް ދެހާސް އަށްވަނަ އަހަރު ރާއްޖޭން ކާމިޔާބުކުރިއިރު އޭރުގެ ކޯޗު ޖޯސެޕް ޔަންކޭޒްގެ އެސިސްޓެންޓެއްގެ ގޮތުގައި މަސައްކަތް ކުރީ މި ދެ ކޯޗުންނެވެ. ރާއްޖޭގެ އެންމެ މަތީ ފެންވަރުގެ މި ދެ ކޯޗުންނަކީ ގިނަ ދުވަސްތަކެއް އެކުގައި މަސައްކަތް ކުރި ގާތް ދެ ރައްޓެހިންވެސްމެއެވެ.
