ހެލްތު ޕްރޮޓެކްޝަން އެޖެންސީ(އެޗްޕީއޭ) އިން ބޭއްވި ނޫސްވެރިންގެ ބައްދަލުވުމުގައި ވެކްސިން ކްލަސްޓަރގެ ފަރާތުން މައުލޫމާތު ދެއްވަމުން ފާތިމަތު އަނާ ވިދާޅުވީ މިހާތަނަށް ވެކްސިންގެ ފުރަތަމަ ޑޯޒް، އާބާދީގެ %60 އިން މައްޗަށް ދެވިފައިވަނީ 120 ރަށުގައިކަމަށެވެ.
އެޗްޕީއޭގެ އުސޫލުގައިވާގޮތުން ކަރަންޓީންވުމަކާ ނުލާ ރަށަކަށް ދެވޭނީ، އެ ރަށެއްގެ އާބާދީގެ %60 މީހުން، ވެކްސިންގެ ދެ ޑޯޒް ފުރިހަމަކޮށްފައިވާނަމައެވެ. އެކަން ފާހަގަކުރައްވަމުން އަނާ ވިދާޅުވީ ރާއްޖޭގައި ވެކްސިންގެ ދެވަނަ ޑޯޒް ދޭން ފެށީ މިމަހުގެ 3 ވަނަ ދުވަހުގައި ކަމަށް ވާއިރުގައި އާބާދީގެ %60 އަށް ދެވަނަ ޑޯޒްގެ ވެކްސިން ދީފައިވާ ރަށެއް އަދި ނެތް ކަމަށެވެ.
އާބާދީގައި %60މީހުންނަށް ވެކްސިން ދީފައި ނުވާ ރަށްރަށަށް ކަރަންޓީނާ ނުލާ ދަތުރުކުރެވޭނީ، ވެކްސިންގެ ދެ ޑޯޒް ފުރިހަމަކުރުމަށްފަހު 2 ހަފްތާ ވެފައިވާ މީހުންނަށް ކަންވެސް އަނާ ފާހަގަކުރެއްވިއެެވެ.
އޭނާ ވިދާޅުވީ ނަގާ ސާމްޕަލްއިން ޕޮޒިޓިވްވާ މިންވަރު %5 އިން މަތީގައި ހުންނަ ރަށަކުން އެހެން ރަށަކަށް ދެވޭނީ ޓެސްޓުކޮށް ނެގެޓިވް ނަތީޖާ ހިފައިގެން ކަމަށާއި، ވެކްސިން ޝަރުތު ހަމަ ނުވާ މީހުންވެސް ނެގެޓިވް ޕީސީއާރް ޓެސްޓް ބޭނުންވާނެ ކަމަށެވެ.
ރާއްޖޭގައި ކޯވިޑް ވެކްސިން ޖަހަން ފަށާފައިވަނީ ފެބްރުއަރީ މަހުގެ އެއްވަނަ ދުވަހުއެވެ. އަދި ދެވަނަ ޑޯޒް ޖަހަން ފެށީ މިމަހުގެ ތިން ވަނަ ދުވަހުގަ އެވެ.
މިހާތަނަށް ރާއްޖޭގައި ޖުމުލަ 287،171 މީހަކު ވަނީ ވެކްސިންގެ ފުރަތަމަ ޑޯޒު ޖަހާފައެވެ. އަދި ދެވަނަ ޑޯޒު ޖަހާފައިވަނީ ޖުމްލަ 62،586 މީހެކެވެ.
