ޓޭބަލްގެ ދެވަނައިގަ އޮތް ވެލެންސިޔާ ކޮޅަށް ފަހަތުން އަރައި ތިން ލަނޑު ޖަހައި މެޗު ކާމިޔާބު ކުރި މެޗަކީ ޔޫވީ ވިދިވިގެން ކާމިޔާބު ކުރި ތިންވަނަ މެޗެވެ. އެންމެ ފަހު މެޗުގައި، ސާންތީގެ އިރުޝާދުގެ ދަށުން ކުޅެމުން އަންނަ ޔޫވީންވަނީ ސުޕަރ ޔުނައިޓެޑު ކޮޅަށް ފަސް ލަނޑު ޖަހާ އެ ޓީމު ބަލިކޮށްފައެވެ. އޭނގެ ކުރިން ޔޫވީންވަނީ ދަ ގްރާންޑޭވެސް ބަލިކޮށްފައެވެ.
ވަނދުކޮށް ލީގު ފަށައިގެން ކުރިއަށް ދިޔަ ޔޫވީން ވެލެންސިޔާ މެޗަށް ނުކުތް އިރު ޓޭބަލްގެ ފުލުގައި އޮތަސް، މިހާރު އޮތީ ހަތްވަނައިގަ، ސުޕަރ ޔުނައިޓެޑުގެ ކުރީގައެވެ. އެހެންނަމަވެސް ސުޕަރ ޔުނައިޓެޑުން ހުކުރު ދުވަހުގެ ރޭ ކުޅޭ މެޗަށް ފަހު ޓޭބަލަށް ބަދަލު އައުމުގެ ފުރުސަތު އެބައޮތެވެ.
ބުރާސްފަތި ދުވަހުގެ ރޭގެ މެޗުގައި ޔޫވީގެ ލަނޑުތައް ޖަހައިދިނީ އިސްމާއިލް އީސާ- މެސީ، މުހައްމަދު އާރިފު- ބަކާ އަދި ބިދޭސީ ކުޅުންތެރިޔާ އަނަޓޮލީއެވެ. މީގެ ތެރެއިން މެސީގެ ލަނޑަކީ ޕެނަލްޓީއެކެވެ. އަދި ބިދޭސީ ކުޅުންތެރިޔާގެ ލަނޑު އެއީ ޖެހި ހިލޭ ޖެހުމަކުން ކާމިޔާބު ކުރި ލަނޑެކެވެ. މެޗުގެ މޮޅު ކުޅުންތެރިއަކަށް ހޮވުނީ ޔޫވީގެ ކީޕަރެވެ.
