އައިޖީއެމްއެޗްގެ އެތެރެހަށީގެ ޑޮކްޓަރު އަދި އެޗްއީއޯސީ ޓެކްނިކަލް ޓީމުގައި ހިމެނިވަޑައިގަންނަވާ ޑރ. މުހައްމަދު އަލީ ވިދާޅުވީ، ހަތަރު މަސް ދުވަހަށް ފަހު ކޮވިޑް ޕޭޝަންޓެއް އިއްޔެ ދޫކޮށްލާފައިވާ ކަމަށެވެ.
ޑރ. މުހައްމަދު އަލީ މިކަން ހިއްސާ ކޮށްފައިވަނީ، އޭނާގެ ފޭސްބުކް އެކައުންޓާއި ޓުވިޓާ އެކައުންޓުގައެވެ.
އެގޮތުން ޑރ. މުހައްމަދު އަލީ ވަނީ، ޕޭޝަންޓު އެނދުމަތި ކުރެވުނު ތާރީހާއި، ދޫކޮށްލި ތާރީހު ފެންނަ ފޮޓޯގަނޑެއް ހިއްސާ ކޮށްފައެވެ. މި ފޮޓޯގައި ވާގޮތުން، އެ ޕޭޝަންޓު އެނދުމަތި ކުރެވިފައިވަނީ، މިދިޔަ އަހަރުގެ ޑިސެމްބަރު މަހު ފަސް ވަނަ ދުވަހު އެވެ. އަދި ދޫކޮށްލާފައިވަނީ އިއްޔެ އެވެ.
މި މުއްދަތުގައި މި ޕޭޝަންޓަށް ފަރުވާ ދީފައިވަނީ، ދަރުމަވަންތަ ހޮސްޕިޓަލުގެ 11 ވަނަ ފްލޯގެ އިތުރުން، އައިޖީއެމްއެޗް އައިސީޔޫ އަދި އައިޖީއެމްއެޗް ޕްރައިވެޓް ވޯޑް 1 ގައި ކަމަށް ޑރ. މުހައްމަދު އަލީ ވިދާޅުވިއެވެ.
މީގެ އިތުރުން، ހޮސްޕިޓަލުގެ ސްޓާފުން، ނަރުހުން، މެޑިކަލް އޮފިސަރުންގެ އިތުރުން، މި ޕޭޝަންޓުގެ ފަރުވާގެ އެކި ކަންކަމުގައި ހަރަކާތްތެރިވި ހުރިހާ އެންމެންވެސް ވަނީ ޕޭޝަންޓަށް އެންމެ ފުރިހަމަ ފަރުވާ ދިނުމަށް މަސައްކަތް ކޮށްފައި ކަމަށް ޑރ. މުހައްމަދު އަލީ ވިދާޅުވި އެވެ. އަދި މިއީ މުޅި ޓީމްގެ "އެފޯޓެއް" ކަމަށް ވިދާޅުވިއެވެ.
