ހެވީލޯޑަކީ މަޖިލީހުގެ ކުރީގެ ނައިބު ރައީސް މޫސާ މަނިކު (ރީކޯ) ގެ މަސްލަހަތު އޮންނަ ކުންފުންޏެކެވެ. އެ ކުންފުންޏަށް ބީއެމްއެލްއިން ދޫކުރި 11 މިލިއަން ޑޮލަރުގެ ލޯނު ނުދެއްކުމުން، އެ ކުންފުނީގެ ތިން ރަށް ވިއްކާލުމަށް ސިވިލް ކޯޓުން ހުއްދަ ދިނުމާ ގުޅިގެން ބީއެމްއެލްއިން ވަނީ މިދިޔަ މަހު އެ ރަށްތައް ވިއްކާލަން އިއުލާން ކޮށްފަ އެވެ.
ވިއްކާލަން އިއުލާން ކޮށްފައިވާ ރަށްތަކަކީ ލ. ފަރެސް އައިލެންޑާއި ކުޑަ ފަރެސް އައިލެންޑް އަދި ބޮޑުހުރާ އައިލެންޑެވެ. މީގެ ތެރެއިން ފަރެސް އާއި ކުޑަފަރެސްއަކީ ރަހާ ރިސޯޓް ހިންގަމުންދާ ދެ ރަށެވެ. އަދި ބޮޑުހުރާއަކީ ދަނޑުވެރިކަމަށް ދޫކޮށްފައިވާ ރަށެކެވެ.
ނަމަވެސް ހެވީލޯޑްގެ ފަރާތުން އެ މައްސަލަ އިސްތިއުނާފު ކުރުމާ ގުޅިގެން، ސިވިލް ކޯޓުން ދީފައިވާ ހުއްދައަށް އަމަލުކުރުން މަޑުޖައްސާލުމަށް ހައިކޯޓުން އަމުރުކޮށްފި އެވެ. ހައިކޯޓުން ނެރުނު އަމުރުގައި ބުނެފައިވަނީ އެ މައްސަލައާ ގުޅިގެން ހައިކޯޓުން ގޮތެއް ނިންމަންދެން އެ ހުއްދައަށް އަމަލުކުރުން ފަސްކުރަން އަންގާ ކަމަށެވެ.
