މަހުލޫފް މިރޭ ކުރެއްވި ޓުވީޓެއްގައި ވިދާޅުވީ، އެމްޑީޕީ ގައުމީ މަޖިލީހުގެ އިންތިހާބުގައި، މެދު އުތުރު ޕްރޮވިންސްގެ ރައީސް ކަމަށް ވާދަ ކުރުމަށް ނިންމަވާފައިވާ ކަމަށެވެ.
މެދު އިތުރު ޕްރޮވިންސަކީ ކ، އއ، އދ އަދި ވ އަތޮޅެވެ. އެގޮތުން މި ދާއިރާގެ އެމްޑީޕީގެ ހުރިހާ މެމްބަރުން މަހުލޫފަށް ތާއީދު ކޮށްދެއްވާނެ ކަމަށް އުއްމީދު ކުރައްވާ ކަމަށް މަހުލޫފު ވިދާޅުވެފައިވެއެވެ.
އަންނަ މެއި 29ގައި އެމްޑީޕީން ބާއްވާ އެމްޑީޕީގެ ގައުމީ މަޖިލީހުގެ އިންތިހާބުުގައި ވާދަ ކުރައްވަން މަހުލޫފް ނިންމަވާފައިވާއިރު، އެމްއެމްޕީޢާރުސީ ހިޔާނާތުގެ ފައިސާ ބޭނުން ކުރި ކަމުގެ ތުހުމަތުތަކެއް މަހުލޫފަށް މީގެ ކުރިން އަމާޒުވެފައި ވެއެވެ. މީގެ ދެއަހަރު ކުރިން މި ތުހުމަތުތައް މަހުލޫފަށް އަމާޒުވުމުން، އޭނާ ވަނީ މި ތުހުމަތުތައް ދޮގު ކުރައްވާފައެވެ.
އެމްއެމްޕީއާރުސީ ހިޔާނާތުގެ މައްސަލަ އަލުން ބައްލަވާނެ ކަމަށް ރައްޔިތުން މަޖިލީހުގެ ރައީސް މުހައްމަދު ނަޝީދު މިއަދު މަޖިލީހުގައި ވިދާޅުވިއިރު، މި ހަފްތާގައި ބޭއްވި އެމްޑީޕީ ގައުމީ މަޖިލީހުގެ ޖަލްސާގައި ވަނީ، އެމްއެމްޕީއާރުސީ ހިޔާނާތުގެ މައްސަލައިގައި އެއްވެސް ތުހުމަތެއް ކުރެވިފައިވާ މީހުންނަށް ކުރިއަށް އޮތް އެޕާޓީގެ އެތެރޭގެ އިންތިހާބުގައި ވާދަ ނުކުރެވޭ ގޮތަށް ނިންމާފައެވެ.
