އިމްތިހާނު ތަކުގެ ޕީޑީއެފް ފައިލްތައް ލީކުވެފައިވަނީ ޒުވާނުން ތެރޭގައި މަޝްހޫރު ސޯޝަލް މީޑިއާ އައުޓްލެޓް، "ޑިސްކޯޑް" ގެ ސާވާއެއް ތެރެއިން ކަމަށް ސީއެންއެމް އަށް މައުލޫމާތު ފޯރުކޮށްދިން އޭލެވެލް ދަރިވަރުންތަކެއް ބުނެފައިވެއެވެ.

އެދަރިވަރުން ސީއެންއެމްއަށް މައުލޫމާތު ދިން ގޮތުގައި، ކެމިސްޓްރީ ޔުނިޓް 1، ފިޒިކްސް ޔުނިޓް 4، ބައޮލޮޖީ ޔުނިޓް 1، މެތަމެޓިކްސް ޕޭޕާ 1، ބިޒްނަސް ޔުނިޓް 1، އައިޓީ ޔުނިޓް 3، ކެމިސްޓްރީ ޔުނިޓް 3، ފިޒިކްސް ޔުނިޓް 1، މެކޭނިކްސް އެމް 2، އަދި ސްޓެޓިސްޓިކްސް އެސް 1 ގެ އިމްތިހާނު ކަރުދާސްތައް ވަނީ ލީކުވެފައެވެ.

މިގޮތަށް ކަރުދާސްތައް ލީކުވެގެން ދިއުމުން ވަރަށް ގިނަ އަދަދެއްގެ އޭލެވެލް ދަރިވަރުން ދަނީ ހިތްހަމަނުޖެހުން ފާޅުކުރަމުންނެވެ.

މިކަމާގުޅިގެން ސީއެންއެމް އިން އެޑިއުކޭޝަން މިނިސްޓްރީގެ ބަހެއް ހޯދުމަށް ގުޅުމުން މިނިސްޓްރީން ބުނީ ކަންތައް ހިނގައިދިޔަ ގޮތް ހާމަކޮށް ބަޔާނެއް ނެރޭނެ ކަމަށެވެ.  

އޭލެވެލް އިމްތިހާނުތައް ދަނީ މިމަހުގެ 26 ވަނަ ދުވަހުން ފެށިގެން ކުރިއަށް ދަމުންނެވެ.