ހައިކޯޓުން އާއްމުކޮށްފައިވާ އެ ކޯޓުގެ ޝެޑިއުލްގައިވާ ގޮތުން މާދަމާ، އިންތިޚާބީ ޝަކުވާގެ ހަތަރު މައްސަލަ އޮންނާނެއެވެ. މައްސަލަތައް އޮންނާނީ މާދަމާ މެންދުރު ފަހު އެކަކުން ފެށިގެން ކަމަށް ހައިކޯޓުގެ ޝެޑިއުލުން ދައްކައެވެ.
އިންތިޚާބީ ޝަކުވާގެ ޖުމުލަ ފަނަރަ މައްސަލަ ހުށަހެޅި، އޭގެ ތެރެއިން ހަ މައްސަލައެއް ހައިކޯޓަށް ބަލައިގެންފައިވާ ކަމަށް އެ ކޯޓުން ކުރިން ވަނީ ބުނެފައެވެ. ހައިކޯޓަށް ބަލައިގަނެފައިވާ މައްސަލަތަކުގެ ތެރެއިން މާދަމާއަށް ތާވަލުކޮށްފައިވާ މައްސަލަަތަކަކީ ހއ. ފިއްލަދޫ، ކ. ތުލުސްދޫ، ތ. ކަނޑޫދޫ އަދި ލ. މާބައިދޫގެ އިންތިޚާބާ ގުޅޭ މައްސަލަތަކެވެ. އަނެއް ދެ ދާއިރާއަކީ ކޮން ދެ ދާއިރާއެއް ކަމެއް ސާފެއް ނުވެއެވެ.
އިންތިޚާބީ ޝަކުވާގެ މައްސަލަތައް ނިންމުމަށް ހައިކޯޓަށް ލިބޭނީ އިންތިޚާބުގެ ރަސްމީ ނަތީޖާ އިއުލާން ކުރާ ދުވަހުން ފެށިގެން ތިރީސް ދުވަހުގެ މުއްދަތެކެވެ. އިންތިޚާބީ ޝަކުވާގެ މައްސަލަ ހައިކޯޓަށް ހުށަހެޅުމުގެ މުއްދަތު މިހާރުވަނީ ހަމަވެފައެވެ.
