މަބްރޫކު މިހެން ވިދާޅުވެފައިވަނީ މިރޭގެ ނޫސްވެރިންގެ ބައްދަލުވުމުގައި، ކޮވިޑާއި ގުޅިގެން ސަރުކާރުން އެޅުމަށް ނިންމާފައިވާ އިތުރު ފިޔަވަޅުތައް އާންމު ކުރުމަށް ފަހު އެވެ.
އެގޮތުން މިއަދު އެޗްޕީއޭއިން އިއުލާނު ކުރި ފިޔަވަޅުތަކުގެ އިތުރުން ދެ ނިންމުމެއް ނިންމާފައިވާކަން މަބްރޫކު ފާހަގަ ކުރެއްވިއެވެ.
ފުރަތަމަ ކަމެއްގެ ގޮތުގައި މަބްރޫކު ފާހަގަ ކުރެއްވީ، ފުލުހުންގެ "އެންފޯސްމަންޓު"ގެ ކަންކަން ވަރުގަދަ ކުރުމަށް ނިންމާފައިވާ ނިންމުމެވެ.
އެގޮތުން މަގުތަށް ބަލަހައްޓަން ތިބޭ ފުލުހުންގެ އަދަދުތައް އިތުރު ކުރުމަށް ނިންމާފައިވާކަން މަބްރޫކު ވިދާޅުވި އެވެ. އަދި މިހާރަށްވުރެ ކަންކަން ރަނގަޅަށް ދޭތޯ ބެލުމަށް ފުލުހުން މަސައްކަތް ކުރާނެ ކަމަށް މަބްރޫކު ފާހަގަ ކުރެއްވި އެވެ.
ދެވަނަ ކަމަކަށް މަބްރޫކު ވިދާޅުވީ މިހާރުން ފެށިގެން، ލޮކްޑައުންގެ ހާލަތަކަށް ރާއްޖެ ހިނގައިދާނެ ކަމަށް އެޗްޕީއޭއިން ތައްޔާރުވާން ފަށާފައިވާ ކަމަށެވެ.
މީގެ ކުރިން އެޗްއީއޯސީގެ ފަރާތުން ޑޮކްޓަރު، ޑރ. އަހުމަދު ޝަހީދު ވެސް ވަނީ އިތުރު ލޮކްޑައުންއަކަށް ދާން ޖެހިދާނެކަން ފާހަގަ ކުރައްވާފައެވެ. މާލެ ސަރަހައްދުގައި އަޅާފައިވާ ފިޔަވަޅުތައް ވަރުގަދަކުރުމާ އެކުވެސް އަދަދުތައް މައްޗަށް ދިއުން ކޮންޓްރޯލް ނުކުރެވޭނަމަ ލޮކްޑައުންއަކަށް ދިއުން އެކަށީގެންވާ ކަމަށް ޑރ. ޝަހީދު ވިދާޅުވި އެވެ. ރާއްޖޭގައި ދުވަހެއް ދުވަހަކަށް ކޮވިޑްގެ ހާލަތު ގޯސްވަމުން އަންނަކަން ޑރ. ޝަހީދު ފާހަގަ ކުރެއްވި އެވެ.
