Advertisement

ހދ. ނޮޅިވަރަމުން ދޫކޮށްފައިވާ ގޯތިތަކުގެ އެއްވެސް ކަމެއް ކުރިއަށް ނުގެންދިއުމަށް އެރަށު ކައުންސިލުގެ މައްޗަށް ވަގުތީ އަމުރެއް ނެރެފި އެވެ.

ނޮޅިވަރަމުން ގޯތި ލިބުނު މީހުންނަށް ޕޮއިންޓު ދީފައިވާ ގޮތް، މިދިޔަ ޖުލައި މަހު 29 ގައި އާންމުކޮށްފައި ވާއިރު ޕޮއިންޓު ދީފައިވާ ގޮތާ މެދު ހިތްހަމަނުޖެހި އެރަށު މެޖިސްޓްރޭޓް ކޯޓަށް ވަނީ މައްސަލައެއް ހުށަހަޅާފަ އެވެ.

އެހެންވެ ނޮޅިވަރަމް މެޖިސްޓްރޭޓުން އިއްޔެ ނެރެފައިވާ އަމުރެއްގައި ބުނެފައި ވަނީ އެރަށުން ދޫކުރާ ބަންޑާރަ ގޯއްޗަށް އެދި، އެރަށު މަޒާ، އަލީ ނަދީމް ހުށަހެޅި ފޯމުގައި ކައިވެނީގެ ސެޓްފިކެޓުގެ ކޮޕީ ހަމައަށް ނެތުމުން ކަމަށް ބުނެ ކައުންސިލުން އެކުލަވާލާފައިވާ ކޮމެޓީން ކައިވެނީގެ މުއްދަތަށް އަލީ ނަދީމްއަށް ޕޮއިންޓު ދީފައި ނުވާތީ ގޯތި ލިބުމުން އޭނާ މަހްރޫމްވެފައިވާ ކަމަށެވެ.

އެގޮތުން އެ މައްސަލަ ބަލައިދިނުމަށް ނަދީމް ހުށަހެޅުމުން، އެކަން ބެލުމުން މި މައްސަލައިގައި ޝަރީއަތުން ވަކި ގޮތެއް ނުނިމެނީސް ގޯތި ދިނުމުގެ ކަންކަން ކުރިއަށް ގެންގޮސްފިނަމަ، ލިބިދާނެ ގެއްލުމަކަށްޓަކައި ގޯތި ދޫކުރުމުގެ އެއްވެސް ކަމެއް ކުރިއަށް ނުގެންގެންދިއުމަށް އަމުރު ކުރާ ކަމަށެވެ.

ޝަރީއަތުން ވަކި ގޮތެއް ކަނޑައަޅަން ދެން އެގޮތަށް އަމަލު ކުރުމަށް ކައުންސިލުގެ މައްޗަށް އަމުރުކޮށްފައި ވަނީ ގޯއްޗަށް އެދި ހުޅުވާލި ފުރުސަތުގައި އަލީ ނަދީމް ހުށަހަޅާފައިވާ ފޯމުގައި ކައިވެނީގެ ސެޓްފިކެޓް ހުށަހަޅާފައިވާ ކަމަށް ނޮޅިވަރަމް ކައުންސިލުން ބަލައިގެންފައިވާކަން އެނގެން އޮންނާތީ އާއި އަދި ކައުންސިލުގެ ފަރާތުން އެ ލިޔުމާއި މެދު އެއްވެސް އިއުތިރާޒެއް ނުކުރާތީ އާއި ކޮމެޓީން އަލީ ނަދީމްއަށް ޕޮއިންޓު ދިނުމުގައި އަމަލުކޮށްފައި ވަނީ ރަނގަޅަށް ނޫންކަން ފާހަގަކުރެވޭތީ ކަމަށެވެ.

އާބާދީގައި 2698 މީހުން ނޮޅިވަރަމުގައި ރަޖިސްޓްރީ އޮތް ނަމަވެސް ރަށުގައި ދިރިއުޅެމުން އަންނަނީ ގާތްގަނޑަކަށް 1800 އެއްހާ މީހުން ކަމަށް އެރަށު ކައުންސިލުގެ ރައީސް އަހުމަދު ރަޝީދު އާދަމް ވިދާޅުވެ އެވެ.

ރަޝީދު ވިދާޅުވީ އެރަށުން ދޫކުރަން ނިންމާފައިވާ 75 ގޯއްޗަށް އެދި 283 މީހުން ފޯމު ހުށަހަޅާފައިވާ ކަމަށެވެ. ރަށުގެ ބަނދަރާ މާދުރު ނޫން ހިސާބަކުން މިފަހަރު ގޯތި ދޫކުރަން ނިންމާފައި ވާއިރު އެރަށުން ގޯތި މި ދޫކުރަނީ ހަތް އަހަރު ފަހުންނެވެ.