ނަސީމު ވިދާޅުވީ މިއަދު މެންދުރުން ފެށިގެން ވަރަށް ބޮޑަށް އެރަށަށް ރާޅުއަރަމުން އަންނަ ކަމަށާއި، ދޯނި އެހެލާ ސަރަހައްދުގައި ހުރި ދޯނިތަކަށް ގެއްލުން ލިބިފައިވާ ކަމަށެވެ.
އަދި ލިބުނު ގެއްލުންތަކުން އަރައިގަތުމަށް ރަށުގެ ރައްޔިތުން ނިކުމެ އަރިއަޅާފައިވާ ދޯނިތައް ކޮޅަށް ޖެހި ކަމަށާއި، ރަށު ފަޅުތެރޭގައިހުރި ބައެއް ދޯނިވެސް މިހާރު އެހެލާފައިވާ ކަމަށް ނަސީމު ވިދާލުވިއެވެ. މީގެ އިތުރުން ދޯނި އެހެލާ ސަރަހައްދުގެ ގޮނޑުދޮށް ވަރަށް ބޮޑަށް ގިރާފައިވާ ކަންވެސް ނަސީމު ފާހަގަ ކުރެއްވިއެވެ.
ހަމައެހެންމެ މިއަދު ރަށަށްއެރި ބިޔަ ރާޅުތަކާއެކު ރަށުގެ ބަނދަރަށްވެސް ވަރަށް ބޮޑެތި ގެއްލުންތަކެއް ލިބިފައިވާ ކަމަށްވެސް ނަސީމު ވިދާޅުވިއެވެ.
މީގެއިތުރުން ބަނދަރުގެ އެތެރޭ ތޮށްޓަށްވެސް އެކިވަރުގެ ގެއްލުން ވެފައިވާ ކަމަށް ނަސީމު ވިދާޅުވިއެވެ.
ނަމަވެސް ރަށުގެ ގެތަކަށް މާބޮޑު ގެއްލުންތަކެއް ލިބިފައި ނުވާކަން ފާހަގަ ކުރަމުން ނަސީމު ވިދާޅުވީ ބޮޑަށް ގެއްލުން ލިބިފައިވަނީ ބަނދަރާއި، ދޯނިތަކުގެ އިތުރުން ދަނޑުތަކަށް ކަމަށެވެ.
އެގޮތުން މިއަދު އެކަނިވެސް 300 އަށްވުރެ ގިނަ ގަސް ވެއްޓިފައިވާކަން ނަސީމު ފާހަގަ ކުރިއެވެ. މިހާރު ކުރަމުންދާ ވިއްސާރައިގައި އެރަށުން 1000 އަށްވުރެ ގިނަ ގަސް ވަނީ ވެއްޓިފައެވެ. މީގެ ތެރޭގައި ފޯދިފައިވާ ގަސްތަކާއި ނިރުތައް ހިމެނެއެވެ.
ވައިކަރަދޫ އަކީ ފުޅާ ދާއިރާއެއްގައި ކޭލުގެ ދަނޑުވެރިކަން ކުރަމުން އަންނަ ރަށަކަށްވާއިރު މިހާރު މިކުރަންދާ ވިއްސާރައިގައި އެރަށުގެ ދަނޑުވެރިންނަށް ވަނީ ވަރަށް ބޮޑެތި ގެއްލުންތަކެއް ވެފައި ކަމަށްވެސް ނަސީމު ވިދާޅުވިއެވެ.
