ޝަހީދު މިހެން ވިދާޅުވީ، ރައީސް ނަޝީދުގެ ވެރިކަމުގައި އިޒްރޭލުން އެ ގައުމުގެ ސިފައިން ހަތިޔާރާއެކު ރާއްޖޭގައި ބައިތިއްބަން އެދުނު ކަމަށް ބުނެ އޮންލައިން ނޫހެއްގައި ލިޔުނު ހަބަރަކާއި ގުޅިގެން ކުރެއްވި ޓުވީޓެއްގައެވެ.
އެގޮތުން ކުރީގެ ޓްރާންސްޕޯޓު އެންޑް ކޮމިޔުނިކޭޝަން މިނިސްޓަރު އާދިލް ސަލީމްގެ ވަޒީރުކަމުގައި، "ސާފު ބަހުން" އެކަން ނުކޮށްދޭނެ ކަމަށް ދިވެހި ސަރުކާރުން އެންގި ކަމަށް ޝަހީދު ވިދާޅުވިއެވެ. އަދި ލިޔެކިއުމުން މިކަމުގެ ސާފު ހެކި ފެންނަން ހުންނާނެ ކަމަށް ޝަހީދު ވިދާޅުވިއެވެ.
މީގެ އިތުރުން، ސާފު ނޫން މައުލޫމާތު ފަތުރައިގެން ފިތުނަ އުފެއްދުމަކީ ނޫސްވެރިކަން ނޫން ކަމަށް އަހުމަދު ޝަހީދު ވިދާޅުވިއެވެ.
މައުލޫމާތު ލިބޭ ގޮތުގައި ރައީސް ނަޝީދުގެ ދައުރުގައި އިޒްރޭލުން، ރާއްޖޭގައި އެގައުމުގެ ސިފައިން ބޭތިއްބުމަށް އެދުނީ އެގައުމުގެ އެއާލައިން ރާއްޖެއަށް ދަތުރުތައް ފެށުމުގެ ގޮތުންނެވެ. އެގޮތުން އިޒްރޭލު ސަރުކާރުން ވަނީ ހަތިޔާރު އެޅި ސިފައިން އެއާޕޯޓުގެ އެކި ސަރަހައްދުތަކުގައި ތިބެގެން މެނުވީ ފްލައިޓުތަކުގެ ރައްކާތެރިކަން ކަށަވަރު ކުރެވެން ނެތް ކަމަށް ބުނެފަައެވެ.
އަހުމަދު ޝަހީދު މިހެން ވިދާޅުވި އިރު، ގިނަ ދިވެހިންތަކެއް އަންނަނީ ފަލަސްތީނުގެ ރައްޔިތުންނާއި ދެކޮޅަށް އިޒްރާއީލުން ދެމުންލާ ލާއިންސާނީ އަނިޔާތައް ކުށްވެރިކޮށް ވާހަކަ ދައްކަމުންނެވެ. އަދި އިޒްރާއީލުގެ ފަތުރުވެރިން ރާއްޖެ އައުން މަނާ ކުރުމަށް އެދިވެސް ގިނަ ބަޔަކު އަންނަނީ ސޯޝަލް މީޑިއާގައި އަޑު އުފުލަމުންނެވެ.
