ހިތަދޫ ސިއްހީ މަރުކަޒުގެ ސީނިއާ އެޑްމިނިސްޓްރޭޓާ މުހައްމަދު ޝިޔާޒު ސީއެންއެމްއަށް ވިދާޅުވީ ޕޮޒިޓިވްވި މީހާއަކީ ކަރަންޓީނުގައި ހުރި މީހެއް ނޫންކަމަށާއި، އޭނާއަށް ބަލިޖެހުނީ ކިހިނެއްކަން އަދި ނޭންގޭ ކަމަށެވެ.
ހިތަދޫން ޕޮޒިޓިވްވި މިމީހާއަކީ މެންދޫގައި މަސައްކަތް ކުރާ ހިތަދޫ ފިރިހެނެކެވެ. އޭނާ ހިތަދޫއަށް ގޮސްފައިވަނީ ޑޮކްޓަރަށް ދައްކާށެވެ.
އަދި ޑޮކްޓަރަށް ދެއްކުމުން ސާމްޕަލް ނަގާފައި އެހިސާބުން ފެށިގެން އޭނާގެ ކޮންޓެކްޓް ޓްރޭސިންގެ މަސައްކަތް ކުރަން ފަށާފައި ވާނެ ކަމަށްވެސް ޝިޔާޒު ވިދާޅުވިއެވެ. އެގޮތުން ރޭގެ ވަގުތެއްގައި ކޮންޓެކްޓް ޓްރޭސިން ހަދައި، އޭނާގެ ޑައިރެކްޓް ކޮންޓެކްޓުން ހޯދިފައިވާ ކަމަށްވެސް ޝިޔާޒު ވިދާޅުވިއެވެ.
ޝިޔާޒު ވިދާޅުވީ މިހާރު ޖުމްލަ 17 ގެއަކާއި ހަތަރު މަސްދޯންޏެއްވެސް ކަރަންޓީނު ކުރެވިފައިވާ ކަމަށެވެ. މީގެ އިތުރުން މެންދޫގައި އެމީހާ އާއި އެކު މަސައްކަތް ކުރަން އުޅުނު މީހުންވެސް މިހާރު ކަރަންޓީނު ކުރެވިފައިވާ ކަމަށް ޝިޔާޒު ވިދާޅުވިއެވެ.
މިހާރު އެޗްޕީއޭއަށްވެސް އަންގާފައި ކަމަށާއި، ނަމަވެސް އަދި ރަށް މޮނިޓަރިންގެ ހާލަތަށް ލާފައި ނުވާ ކަމަށްވެސް ޝިޔާޒު ވިދާޅުވިއެވެ.
