މޫޑީސް އިން މި މަހު ޝާއިއުކޮށްފައިވާ މާލީ ރިޕޯޓުގައި ރާއްޖެއަށް ކުރިއަށް އޮތް ތަނުގައިވެސް ގިނަ އިގްތިސާދީ ގޮންޖެހުންތަކެއް ކުރިމަތިވާނެ ކަމަށާއި ދަރަނި ބޮޑުތަނުން އިތުރުވާނެ ކަމަށް ލަފާކޮށްފައިވެއެވެ. އަދި ދަރަނި އަނބުރާ ދެއްކުމުގައި ގޮންޖެހުންތައް މެދުވެރިވެ، ދަރަނި ނުދެއްކިދާނެ ކަމުގެ ބިރު އޮތް ކަމަށް ބުނެފައިވެއެވެ.
މިކަމާ ގުޅިގެން މިއަދު ފިނޭންސް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު އަމީރު ވިދާޅުވީ މި އަހަރު ރާއްޖޭގެ ޑެފިސިޓް އިން އަރައިގަނެވެމުން އަންނަ ކަމަށާއި އަހަރު ނިމޭ އިރު ޑެފިސިޓް ކުޑަވާނެ ކަމަށް ލަފާކުރެވޭ ކަމަށެވެ.
އޭގެ އިތުރުން ދަރަނި ބޮޑުވާނެތީ ރާއްޖެއަށް އިތުރަށް ފަންޑު ހޯދުމުގެ ދަތިތަކެއް ހުރެދާނެ ކަމަށް ދެކެވޭ ވާހަކަތައް މިނިސްޓަރު ވަނީ ދޮގުކޮށްފައެވެ. މިނިސްޓަރު ވިދާޅުވީ އެންމެ ފަހުން މޫޑީސް އިން އެ ނެރުނީކީއެއް އާ ރިޕޯޓެއް ނޫން ކަމަށެވެ. އަދި އެ ރިޕޯޓަކީ މިދިޔަ އަހަރު ހަދާފަ އޮތް ރިޕޯޓެއް ކަމަށާއި އަދިވެސް ކުރީގަ އޮތް ހާލަތު މެއިންޓެއިން ކުރާ ކަމަށްވެސް މިނިސްޓަރު ވިދާޅުވިއެވެ.
ރާއްޖެއަށް މޫޑީސްއިން ކުރިން ދިން ރޭޓިން ބަދަލުކުރީ ފާއިތުވި އަހަރުގައެވެ. މޫޑީސް އިން މިފަހަރު ރާއްޖެއަށް ދީފައިވާ ރޭޓިން އަކީ ދަރަނި އަނބުރާ ދެއްކުމުގައި ގޮންޖެހުންތައް މެދުވެރިވެ، ދަރަނި ނުދެއްކިދާނެ ކަމުގެ ބިރު އޮތް ކަމަށް ބަލައި ދޭ ރޭޓިންއެކެވެ. މޫޑީސްއިން ފާއިތުވި އަހަރު ރާއްޖެއަށް ދިން ރޭޓިން އެގޮތުގައި ދަމަހައްޓަން ނިންމި ސަބަބުތަކުގެ ތެރޭގައި މޫސުމަށް އަންނަ ބަދަލުތަކާއި ގުދުރަތީ ނުރައްކާތަކުން ކުރިތިމަވާ މާލީ ގެއްލުންތައް އިތުރުވުން އަދި ފަތުރުވެރިކަން ދަށްވުން ހިމެނެއެވެ.
