ނައިޖީރިއާ ސަރުކާރުން ވަކި މުއްދަތެއް ނެތް ގޮތަށް ޓްވިޓާ ސަސްޕެންޑްކުރަން ނިންމިތާ އެއް ދުވަސް ފަހުން ނައިޖީރިއާގެ ޓެލެކޮމް އޮޕަރޭޓަރުން ވަނީ އެގައުމުގައި ޓްވިޓާ ބޭނުން ނުކުރެވޭ ގޮތަށް ހަދާފައެވެ.
އަލްޖަޒީރާގައި ރިޕޯޓްކުރާ ގޮތުގައި އެފްރިކާގެ އެންމެ ބޮޑު އާބާދީއެއް އޮންނަ ގައުމުގައި ޓްވިޓާ މަނާކޮށްފައިި ވަނީ އެގައުމުގެ ރައީސް ބުހާރީގެ ޓްވީޓެއް ޓްވީޓާގެ ގަވައިދުތަކާއި ހިލާފުވުމުން އެ މައިކްރޮބްލޮގް ސައިޓުން ޑިލީޓްކުރިތާ ދެ ދުވަސް ފަހުންނެވެ.
އެގައުމުގެ އިންފޮމޭޝަން މިނިސްޓްރީގެ ތަރުޖަމާނު ސެގެން އެޑޭމީ ވިދާޅުވީ އެގައުމުގެ މައި ސަރުކާރުން ވަނީ ވަކި މުއްދަތެއް ނެތް ގޮތަށް އެގައުމުގައި ޓްވިޓާ ސަސްޕެންޑްކޮށްފައި ކަމަށެވެ.
އެކާމާ ގުޅިގެން ޓްވިޓާއިން ބުނީ ނައިޖީރިއާގެ ސަރުކާރުގެ އަމަލުތައް ހުރީ "ވަރަށް ކަންބޮޑުވާ" ގޮތަކަށް ކަމަށެވެ.
ނައިޖީރިއާގެ ސަރުކާރުން ޓްވިޓާ މަނާކުމުން އިންސާނީ ހައްގުތައް ހިމާޔާތް ކުރާ ފަރާތްތަކާއި އަދި ސޯޝަލް މީޑިއާގައި އެތައް ބަޔަކު ވަނީ ކުށްވެރިކޮށްފައެވެ.
ހުކުރު ދުވަހު އެމްނެސްޓީ އިންޓަނޭޝަނަލްއިން ވެސް ނައިޖީރިއާ ސަރުކާރުން ޓްވިޓާ މަނާކުރި ކުރުން ކުށްވެރިކޮށްފައެވެ. އެމްނެސްޓީ އިން މިއަަމަލު ސިފަ ކުރީ "ހިޔާލު ފާޅުކުރުމުގެ މިނިވަންކަން ސެންސަރު ކުރުމުގެ" ގޮތަށެވެ.
