ރައްޔިތުންގެ މަޖިލީހުގެ އިމްތިޔާޒަށް އަރައިގަތުމުގެ ތުހުމަތުގައި ދައުވާކޮށްދޭން ޕްރޮސިކިއުޓަ ޖެނެރަލްގެ އޮފީހުގައި އެދިފައިވާ ޑިފެންސް މިނިސްޓްރީގެ ނައިބު ހަސަން ޒަމީލްގެ މައްސަލަ މަޖިލީހުގެ އިމްތިޔާޒާއި ސުލޫކީ ކޮމިޓީން ބޭރުކޮށްލި މައްސަލަ އާ ގުޅިގެން، އެމްޑީޕީގެ ސުޕަ މެޖޯރިޓީ އޮވެމެ އެ މައްސަލަ ބޭރުކޮށްލެއްވުމުގައި ރައީސް ސޯލިހުގެ ޅިޔަނެއް ކަމަށްވާ މެންބަރު ރަޝީދުގެ އަތެއް ވާކަމަށް ބުނެ އެމްޑީޕީގެ ގިނަ މެންބަރުން އަންނަނީ ބިގޭއަށް ވަރަށް ބޮޑަށް ފާޑު ކިޔަމުންނެވެ.
މި މައްސަލަ ހޫނު ވެފައިވަނިކޮށް ރައީސް ނަޝީދު މިއަދު ކުރެއްވި ޓްވީޓެއްގައި ވިދާޅުވީ އަލީފުށީ ދާއިރާގެ މެންބަރު ސިޔާސީ ފައިދާއަށް ކުރައްވާ ކަންކަމާއި ބުނުއްވާނެ ބަސްފުޅުތައް އެނގިވަޑައިގަންނަވާނީ އެބޭފުޅާއަށް ކަމަށެވެ.
އަދި އެމަނިކުފާނަށް ރަނގަޅީ އެމަނިކުފާނަށް ވަފާތެރިވާ މީހުންގެ ވާހަކަ މެންބަރު ނުދެއްކެވުން ކަމަށް ވެސް ރައީސް ނަޝީދު ވިދާޅުވިއެވެ.
މި މައްސަލާގައި ޒަމީލުގެ މައްސަލަ ނުބަލަން އިމްތިޔާޒު ކޮމިޓީން ނިންމީ އެމްޑީޕީގެ ހަތަރު މެންބަރުންވެސް ވޯޓު ދެއްވައިގެންނެވެ. އެ ބޭފުޅުންގެ ނަންފުޅުތައް ހާމަވުމާއެކު އެ ބޭފުޅުން މިހާރު ގެންދަވަނީ އެކަމުގެ ކަންބޮޑުވުން ހާމަކުރައްވައި ކޮމިޓީގެ ކަންކަން ހާމަވި ގޮތް އޮޅުންފިލުއްވަން މަސައްކަތްކުރައްވަމުންނެވެ.