މިއަދުގެ ހުކުރު ހުތުބާގައި ބުނީ، ބުއްދި އަކީ ރިޒުގު ދެއްވާފަދައިން އެކި ވަރުވަރަށް އެކި އިންސާނުންނަށް ﷲ ދެއްވާ މަތިވެރި ނިއުމަތެއް ކަމަށެވެ.
ބުއްދިވެރިކަން ލިބިގެންވާ މީހާގެ އެތައް ކަމެއް ފުރިހަމަވެގެން ވާ ކަމަށާއި، ބުއްދިވެރިކަމެއް ނެތް މީހާ އާއި، ބުއްދީގެ ބޭނުން ހެޔޮގޮތުގައި ނުހިފާމީހާގެ އެތައް ކަމެއް އުނިވެގެންވާ ކަމަށެވެ.
ހުކުރު ހުތުބާގައި ބުނީ، އިންސާނުން އެކި ރޮނގުތަކުން ކުރިއަރައިގޮސް، މީގެ ކުރީން ދެކިފައިނުވާ އިލްމީ އާލަމެއް އިންސާނުން ދެކެމުން މިދަނީ ބުއްދީގެ އަލީގައިކަން ކަށަވަރު ކަމަށާއި، އަދުގެ ދުނިޔެ ދެކެމުން މިދާ އަޖައިބުން ފުރިގެންވާ އިލްމީ ވަސީލަތްތައް އުފެއްދީ ނިކަމެތި އިންސާނާގެ ބުއްދި ކަމަށެެވެ.
ދުނިޔޭގެ އެއްވެސް އެދުމެއް ނެތް، ބުއްދިވެރިކަމުގެ ސިފަ މަލާއިކަތުންނަށް ﷲ ދެއްވާފައިވާކަމަށް އިލްމުވެރިންގެ ކިބައިން ވާރިދުވެގެންވާކަން ފާހަގަކުރަމުން ހުތުބާގަައި ބުނީ، ބުއްދިވެރިކަމާ ނުލައި ދުނިޔޭގެ އެދުން ޖަނަވާރުންގެ ކިބައިގައި ލައްވާފައިވާ ކަމަށެެވެ.
މިކަންކަމުން އެނގި ފާޅުވަނީ ބުއްދި އަކީ ނިއުމަތެއް ކަމެއް ކަން ފާހަގަކުރަމުން ހުތުބާގައި ބުނީ، އެއާމެދު އިންސާނާ އޭނާ ހައްދަވައި ބޮޑުކުރެއްވި ރަސްކަލާނގެ ހަޟްރަތަށް ޝުކުރުވެރިވެ، ބުއްދިއަށް އުނިކަން ލިބޭ ޒާތުގެ ކަންކަމުން ދުރުހެލިވާން ޖެހޭނެ ކަމަށެވެ. އޭގެތެރޭގައި، ޖުވާ
ކުޅުމާއި، ރާބުއިމާއި، މަސްތުވާތަކެތި ބޭނުންކުރުމާއި، ހަރާމްތަކެތި ކެއުން ފަދަ ކަންކަމީ ދެ ދުނިޔޭގައި ވެސް ގެއްލުންހުރި ކަންކަން ކަމަށް ހުތުބާގައި ބުނެފައިވެއެވެ.
ހުތުބާގައި އިތުރަށް ބުނީ، ބުއްދިވެރި ހެޔޮ ލަފާ މުޖުތަމައެއް ބިނާކުރެވޭނީ މުޖުތަމައުގެ އެންމެހައި އަފްރާދުން އެއްބަޔަކު އަނެއް ބަޔަކަށް އެހީތެރިވެ ވާގިވެރިވެގެން ކަމަށެވެ.
