އަޖޭ ދޭވްގަނާއި ދިލް ރާޖޫ ވަނީ މި ފިލްމުގެ ހުރިހާ ރައިޓްސް އެއް ހޯދާފައިއެވެ. މި އަހަރުގެ 19 ފެބްރުއަރީ ވަނަ ދުވަހު ރިލީޒް ކޮށްފައިވާ މި ފިލްމަކީ ކޯޓްރޫމް ޑްރާމާއެކެވެ. މި ފިލްމު ޑައިރެކްޓު ކޮށްފައިވަނީ ވިޖޭ ކަނަކަމެދެލާ އެވެ. އަދި ޕްރޮޑިއުސް ކޮށްފައިވަނީ ސަތިސް ވެގެސްނާއެވެ.
އަޖޭ ބުނެފައިވަނީ އޭނާ އެ ފިލްމުގެ ހިންދީ ރިމޭކް އެއް ހަދަން ނިންމީ ވިހާވެސް ގިނަ މީހުންނާއި ހަމަޔަށް މި ފިލްމު ގެނެސްދިނުމަށްކަމަށެވެ. މީގެ އިތުރުން އޭނާ ބުނެފައިވަނީ މި ފިލްމުން އާންމުންނައް ވަރަށް މުހިންމު މެސެޖެއް ފޯރުކޮށްދޭކަމަށެވެ.
"ނާންދާ އަކީ އަސްލު ވަރަށް މުހިންމު ފިލްމެއް، މި ފިލްމުން ޖުޑިސަރީ އަދި އެހެން ދާއިރާ ތަކުގައި ހުރި މައްސަލަތައް ވެސް ދައްކުވައިދޭ. އޮރިިޖިނަލް ތެލެގޫ ފިލްމުގެ ސަބަބުން ވަރަށް ގިނަބަޔަކަށް ބައިވަރު ކަންތައް އެނގިގެންގޮއްސަ ވަނީ. އަހަރެން ބޭނުމީ އަދި އިތުރު މީހުންނައް މި މެސެޖް ފޯރުކޮށްދޭން." އަޖޭ ދޭވްގަން ބުނެފައިވެއެވެ.
"އަހަރެން ވަރަށް އުފާވޭ އަޖޭ އާއި އެކު މަސައްކަތް ކުރަން ލިބުނީމަ. މިއީ ވަރަށް މުހިންމު ވާހަކަތަކެއް ގެނެސްދޭ ފިލްމެއް. ސްކްރިޕްޓް ވެސް އަހަރެމެން މިހާރު ފައިނަލް ކޮށްފިން. އެކަމަކު މަސައްކަތް އަދި އޮތީ ވަރަށް ކުރީ މަރުހަލާއެއްގައި ކަމަށްވާތީ ފިލްމުގެ ޑައިރެކްޓަރާއި ކާސްޓުން ހަމަޖެހުނީމަ އިތުރު ތަފުސީލު ދޭނަން" ދިލް ރާޖޫ ބުނެފައިވެއެވެ.
