ތިނަދޫގައި ކޮވިޑް-19 ގެ ބަލިމަޑުކަން ފެތުރި ރަށުގެ ހާލަތު ރަގަނޅުނުވެ ކޮމިޔުނިޓީ ސްޕްރެޑަކަށް
ބަދަލުވެފައިވާތީ، ރައްޔިތުންގެ ސިއްހީ ރައްކާތެރިކަމަށްޓަކައި 14 ދުވަހުގެ ނިޔަލަށް ރަށުގެ ކާފިއު ވަގުތު 24 ގަޑިއިރަށް އޮތީ ބަދަލުކޮށްފައެވެ.
އެހެންނަމަވެސް ތިނަދޫގައި ބަލި ފެތުރުން ހިފެހެއްޓިފައިނުވާތީ، މާދަމާއިން ފެށިގެން ހަތް ދުވަހުގެ ނިޔަލަށް ތިނަދޫގައި އިއުލާންކޮށްފައިވާ ކާފިއުގެ ވަގުތު ދެމިއޮންނާނެކަން އެ ރަށުކައުންސިލުން ވަނީ އިއުލާންކޮށްފައެވެ.
އަދި މިއަދު ބޭއްވުނު ތިނަދޫ އިމަޖެންސީ އޮޕަރޭޝަން ސެންޓަރުގެ ބައްދަލުވުމެއްގައި ވަނީ ކުރިންކޮށްފައިވާ އަޅާފައިވާ ފިޔަވަޅުތަކަށް ބަދަލު ގެނެސް ހަރުކަށިކޮށްފައެވެ.
ގެނެސްފައިވާ އިސްލާހުތައް:
- ކޮންމެ ގެއަކަށް ދޫކޮށްފައިވާ ހައުސް ހޯލްޑް ޕާމިޓް އެއް ހަފްތާ މުއްދަތަށް ކެންސަލްކުރުން
- ކަސްރަތު ކުރުމަށް ކުރިން ދީފައިވާ ގަޑިތައް ހުއްޓާލުން
- ހެލްތް ޕްރޮޓެކްޝަން އެޖެންސީއިން އަންގާފައިވާ ގޮތަށް ސަރުކާރު އިދާރާތަކުންދޭ ޒަރޫރީ ބޭނުންތަކަށް އޮފީސްތަކަށް ދާންޖެހޭ އެންމެ މަދު މުވައްޒަފުން ބޭނުންކޮށްގެން ހިދުމަތްދިނުން
- އަމިއްލަ ކާރުތަކުގެ ދަތުރުތައް
ހުއްޓާލުން - ފުލުހުންދޭ ޓައިމް ބައުންޑް ޕާރމިޓް ނެތް ފަރާތްތަކަށް ޓެކްސީގެ ޙިދުމަތްދޭ ކާރުތަކުން ހިދުމަތް ނުދިނުން. އަދި އެފަދަ ހުއްދަނެތި
ހިދުމަތް ދޭ ޓެކްސީތަކުގެ ހުއްދަ އެއް ހަފްތާ މުއްދަތަށް ހިފެހެއްޓުން - ހޮޓާ އަދި ރެސްޓޯރަންޓް ތަކުގެ ހިދުމަތް ހެނދުނު 08:00 އިން ރޭގަނޑު 22:00 އަށް ޑެލިވަރީއަށް ބަދަލުކުރުމާއި ކަސްޓަމަރުން ވައްދައިގެން ހިދުމަތްދިނުން ހުއްޓާލުން. އަދި ކަސްޓަމަރުން ވައްދައިގެން ޙިދުމަތްދޭ ތަންތަނުގެ ހުއްދަތައް އެއް ހަފްތާ މުއްދަތަށް ހިފަހެއްޓުން. އަދި ޑެލިވަރީ ގަޑިތައް ފިޔަވައި އެހެން ގަޑިތަކުގައި ޑެލިވަރީ ފާސް ބޭނުންކޮށްގެން ބޭރުގައި އުޅޭފަރާތްތަކުގެ ފާސްތައް ކެންސަލް ކުރުން.
- ކަނޑު މަސްވެރިކަން ކުރާ ދޯނިފަހަރުތައް މަހަށް ފުރުމަށްފަހު އެބުރި ރަށަށްއައިނަމަވެސް ރަށަށް ނުފޭބުން. އަދި އެނޫން މަސްވެރިކަން އެއް ހަފްތާ މުއްދަތަށް ހުއްޓާލުން
- ސަރުކާރުން ހުއްދަ ދީފައިނުވާ އެންމެހާ މަސައްކަތްތައް އެއް ހަފްތާ މުއްދަތަށް ހުއްޓާލުން.
ތިނަދޫ ކައުންސިލުން އިތުރަށް ބުނީ ތިނަދޫއަށް ދިމާވެފައިވާ ކޮވިޑް 19ގެ ހާލަތުން އަރައިގަތުމަށް އާންމުންގެ އެއްބާރުލުން މިހާރަށްވުރެބޮޑަށް ބޭނުންވާ ވާހަކަ ކަމަށެވެ.
ތިނަދޫއިން މިހާރު މުޅި ޖުމްލަ 726 މީހުން ވަނީ ކޮވިޑް-19އަށް ޕޮޒިޓިވްވެފައެވެ. އޭގެތެރެއިން 451 މީހަކު ރަނގަޅުވިއިރު މިހާރުވެސް ބަލިޖެހިފައިވާ 275 މީހުން ތިނަދޫގައި އެބަތިއްބެވެ.
އަދި ބަލިޖެހިގެން ދެ މީހަކު މަރުވެފައިވާއިރު، ހޮސްޕިޓަލުގައި މިވަގުތު ކޮވިޑަށް ފަރުވާދެމުންދަނީ އެންމެ މީހަކަށެވެ.
ތިނަދޫގައި ވެކްސިންގެ ފުރަތަމަ ޑޯޒް 3806 މީހަކު ޖަހާފައިވާއިރު، ދެވަނަ ޑޯޒް ޖަހާ ވެކްސިން ފުރިހަމަކޮށްފައިވަނީ 2375 މީހުންނެވެ.
