ޓީއޭއިން ނެރުނު ނޫސްބަޔާނެއްގައި މިކަން ކަށަވަރުކޮށްދީފައިވާއިރު، އެ އެސޯސިއޭޝަން އިން ވަނީ އިއްޒުއްދީން ސްކޫލްގެ ޕްރިންސިޕަލް އެކިކަހަަލަ ފުރައްސާރަކުރިކަމަށް މިނިސްޓްރީ އޮފް އެޑިއުކޭޝަން އާއި ކަމާ ބެހޭ ފަރާތްތަކަށް މައްސަލަ ހުށަހެޅިކަމަށް ބުނެފައެވެ.
އަދި ޖިންސީ ފުރައްސާރައިގެ އަމަލު ސާބިތުވީނަމަވެސް އެއްވެސް ފިޔަވަޅެއް އަޅާފައިނުވާކަން ފާހަގަކޮށް މައްސަލަތަކަށް ފިޔަވަޅު އެޅުމުގެ ބަދަލުގައި އަނިޔާކުރި ޕްރިންސިޕަލަށް ހިމާތަޔްދިންކަމަށް ބުނެ އެޑިއުކޭޝަން މިނިސްޓްރީން ކުރަމުންދާ މަސައްކަތް ހަރުކަށި އިބާރާތުން ކުށްވެރިކޮށްފައެވެ.
ޓީއޭ އިން ވަނީ ޖިންސީ މައްސަލައިގެ ފުރައްސާރައަށް ވީ ޓީޗަރުންނަށް، ޓީޗަރުންގެ ބެލެނިވެރިންނަކީ އެޑިއުކޭޝަން މިނިސްޓްރީ ކަމުގައިވާހިނދު، އެމިނިސްޓްރީން ޓީޗަރުންގެ ހައްގުތަކަށް ބޭއިންސާފުވެފައިވާކަމަށް ބުނެފައެވެ.
އަދި އެއީ އެ ޖަމިއްޔާއިން ކަންބޮޑުވުން ފާޅުކުރާ ކަމެއްކަން ފާހަގަކޮށް ޓީއޭއިން ވަނީ މިމައްސަލަ ރައްދުވާ ފަރާތުގެ މަސްލަހަތު އިސްކޮށް، ޕްރިންސިޕަލް ހިމާޔަތްކުރުމަށް ކުރަމުންގެންދާ މަސައްކަތްތައް ކުރުން ހުއްޓާލުމަށް ގޮވާލާފައެވެ.
މީގެއިތުރުން، ގާނޫނީ ގޮތުން މިފަދަ އަމަލުތަކާއި ދެކޮޅަށް އަޅަންޖެހޭ ފިޔަވަޅު އެޅުމަށާއި، ޖިންސީ ފުރައްސާރައިގެ އަމަލުތައް ހިންގާ މީހުންނަށް ހިތްވަރު ލިބޭ ފަދަ މޭރުމުން އަމަލު ނުކުރުމަށްވެސް ޓީއޭއިން ގޮވާލައިފައިވެއެވެ.
