ފޮރިން މިނިސްޓްރީ ޢިމާރާތުގެ ނަން ފަތުހުﷲ ޖަމީލް ބިލްޑިންގެ ނަމަށް ބަދަލުކޮށްފައިވަނީ މިއަދު އެމިނިސްޓްރީގައި ބޭއްވި ރަސްމިއްޔާތުގައެވެ.
އެ މިނިސްޓްރީގެ ނަން ފަތުހުﷲ ޖަމީލް ބިލްޑިންގެ ނަމަށް ބަދަލުވެގެން ދިޔުމާއި ގުޅިގެން ރައީސް ނަޝީދު ކުރެއްވި ޓްވީޓެއްގައި ވިދާޅުވީ، ފަތުހުﷲ ޖަމީލަކީ ހާރިޖީ ސިޔާސަތު ބިނާ ކުރެއްވުމުގައި އަދި ކުދި ގައުމުތަކަށް ބައިނަލް އަގުވާމީ އާޢިލާގައި މަތިވެރި ދައުރެއް އަދާކުރުމަށް ގިނަ ފުރުސުތުތަކެއް ހޯއްދަވާދެއްވި އިލްމްވެރި ފިލޯސަފަރެއް ކަމަށެވެ.
އެހެންކަމުން ރާއްޖޭގެ ހާރިޖީ އޮފީހުގެ ނަން މިހާރު އެވަނީ އެންމެ ރަނގަޅަށް ބަދަލުވެފައި ކަމަށް ރައީސް ނަޝީދު ވިދާޅުވިއެވެ.
ފޮރިން މިނިސްޓްރީ އިމާރާތުގެ ނަން ފަތުޙުﷲ ޖަމީލް ބިލްޑިންގެ ނަމަށް ބަދަލު ކުރުމަށް އެމިނިސްޓްރީގައި މިއަދު ބޭއްވި ރަސްމިއްޔާތުގައި ރައީސް ވިދާޅުވީ، ދައުލަތުގެ އެންމެ މުހިންމު އެއް މިނިސްޓްރީގެ އިމާރާތް، އެމިނިސްޓްރީ ހިންގެވި ބޭފުޅެއްގެ ނަމަށް ނިސްބަތްކޮށްގެން ހުޅުވޭކަމީ، ރާއްޖޭގެ ހާރިޖީ ހިދުމަތުގެ ދާއިރާގައި، އެމަނިކުފާނު ކުރައްވާފައިވާ ހިދުމަތްތަކުގެ މަތިވެރިކަން ރަމްޒުކޮށްދޭނެ ކަމެއް ކަމަށެވެ.
އެ އިމާރާތަކީ، ވެރިރަށް މާލޭގެ މަލަމަތިން، ދިވެހިންގެ ގައުމީވަންތަކަމާއި ދިވެހިރާއްޖޭގެ ހައިބަތު ރަމްޒުކޮށްދިނުމުގެ މަގްސަދުގައި، އަލްމަރްހޫމް ފަތުޙުﷲ ޖަމީލްގެ ވިސްނުންފުޅާއި ހިޔާލުފުޅާ އެއްގޮތަށް، އެމަނިކުފާނުގެ މޭސްތިރިކަމުގެ ދަށުން ފަރުމާކޮށްފައިވާ އިމާރާތެއް ކަމަށް ރައީސް ވިދާޅުވިއެވެ.
ރައީސް ވަނީ ރާއްޖެއަށް ފުރިހަމަ މިނިވަންކަން ލިބިގެން މިހޭދަވި 56 އަހަރުގެ ތެރޭގައިވެސް، ރާއްޖެއިން ދަމަހައްޓަމުން އައި ހާރިޖީ ސިޔާސަތަކީ، އިންސާނީ ހައްގުތައް ފުރިހަމައަށް ރައްކާތެރިކުރުމާ އެކު، މިނިވަންކަމާއި ސުލްހަވެރިކަމާއި ހަމަޖެހުން ގާއިމުކޮށް ދެމެހެއްޓުންކަން ފާހަގަކުރައްވާފައެވެ. ރާއްޖޭގެ އެންމެ މަތީ މަސްލަހަތު ބިނާވެފައިވަނީ މިދެންނެވި އަސާސްތަކުގެ މަތީގައިކަމަށާއި، ފަތުޙުﷲ ޖަމީލުގެ ހާރިޖީ ވަޒީރުކަމުގައިވެސް، އެންމެ ބޮޑު އިސްކަމެއް ދެއްވީ، މިދެންނެވި ސިޔާސަތުތައް ނެގެހެއްޓުމަށްޓަކައި، ބައިނަލްއަގްވާމީ މަސްރަހުގައި ވަކާލާތު ކުރެއްވުން ކަމުގައި ރައީސް ވިދާޅުވިއެވެ.
އިމާރާތް ފަތުޙުﷲ ޖަމީލްގެ ނަންފުޅަށް ހާއްސަކުރުމުގެ ބޭނުމަކީ ރާއްޖޭގެ ހާރިޖީ ދާއިރާ ބިނާކުރައްވައި ތަރައްގީކުރެއްވުމުގައި، 27 އަހަރާއި 4 މަސް ވަންދެން އެމަނިކުފާނު ކުރެއްވި، ގައުމީ ހިދުމަތުގެ އަގު، ދާއިމީ ގޮތެއްގައި ގައުމީ ފެންވަރުގައި ފާހަގަކުރެވޭނެ ގޮތެއް ހެދުން ކަމަށް ރައީސް ސޯލިހް ވަނީ ވިދާޅުވެފައެވެ.
