ކުޅުދުއްފުށީ ސިޓީ ކައުންސިލްގެ މޭޔަރު މުހައްމަދު އާތިފް ސީއެންއެމް އަށް ވިދާޅުވީ އެސިޓީ އަށް އަރައި، ފޭބުން ބަންދުކުރީ އިއްޔެނެގި ރެންޑަމް ސާމްޕަލެއް ޕޮޒިޓިވް ވުމާގުޅިގެން ކަމަށެވެ. ޕޮޒިޓިވް ވީ އުމުރުން 13 އަހަރުގެ ކުއްޖެއްގެ ސާމްޕަލްއެވެ.

އާތިފް ވިދާޅުވީ އެ ކޭސްއާގުޅިގެން ކޮންޓެކްޓް ޓްރޭސިންގެ މަސައްކަތް މިހާރު އެސިޓީގައި ފަށާފައިވާކަމަށެވެ. ކުޅުދުއްފުށި ދެވަނަފަހަރަށް ބަންދު މިކުރެވުނީ ގާތްގަނޑަކަށް މަހެއްހާ ދުވަސް ފަހުން ކަމަށް ކައުންސިލުން ބުނެއެވެ. 

އީދު ބަންދާ ގުޅިގެން އެޗްޕީއޭއިން ވަނީ ދޫތަކެއް ދީފައެވެ. އެހެންނަމަވެސް ފޯރީގައި އީދު ފާހަގަކުރާ ކުޅުދުއްފުށީ ސިޓީގައި މިފަހަރު އީދާގުޅިގެން އެއްވެސް ހަރަކާތެއް ނުބާއްވައެވެ. އާތިފް ވިދާޅުވީ މަށިމާލި، ހިއްޗަށް ވަޑައިގަތުން އަދި އެކިވައްތަރުގެ ޕެރޭޑްތައް ކޮންމެ އަހަރަކުވެސް ފާހަގަ ކުރާ ކަމަށާއި އެކަމަކު މިއަހަރު އެކަމަށް ތައްޔާރު ވެފައި، ހުއްޓާލީ ކަމަށެވެ.

މިވަގުތު މޮނިޓަރިންގައި އޮތީ ގދ.ތިނަދޫ، ފ.ފީއަލި، ފުވައްމުލައް ސިޓީ، ގއ.ވިލިނގިލި، އއ.ތޮއްޑޫ، ރ.ދުވާފަރު، ގއ.ކޫއްޑޫ، ރ.މީދޫ، ކ.ގުރައިދޫ، ށ.ފޯކައިދޫ، ގދ.ނަޑެއްލާ، ކ.ކާށިދޫ، އއ.ރަސްދޫ، ރ.ކިނބިދޫ އެވެ.