Advertisement

މާބަނޑު މީހުންނަށް ހާއްސަ މައުލޫމާތު ދިނުމުގެ ކްލާސްތަކެއް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗު) ގައި ބޭއްވުމަށް ނިންމައިފި އެވެ.

އައިޖީއެމްއެޗުން ބުނީ އެ ކުލާސްތައް ބޭއްވުމަށް ހަމަޖެހިފައި ވަނީ ކޮންމެ މަހެއްގެ ހޮނިހިރު ދުވަހު ކަމަށެވެ. އެގޮތުން ކޮންމެ މަހެއްގެ ފުރަތަމަ އަދި ތިންވަނަ ހޮނިހިރު ދުވަހު ހެނދުނު 10 އިން 11 އަށް ކުލާހުގައި މާބަނޑު ބޭފުޅުންނަށް ބޭނުންވާ ދުޅަހެޔޮ ކާނާގެ މައުލޫމާތު ލިބިގެން ދާނެ ކަމަށް އައިޖީއެމްއެޗުން ވަނީ ބުނެފަ އެވެ.

މެންދުރު 12 އިން އެކަކަށް މާބަނޑު ބޭފުޅުންގެ ކަސްރަތު ކްލާސްތައް އޮންނައިރު މެންދުރުފަހު ދެއަކުން ތިނެކަށް ވިހެއުމާއި ވިއްސާ ކޮޓަރިއާ ބެހޭ މައުލޫމާތުދޭ ކްލާސްތައް އޮންނާނެ ކަމަށް އައިޖީއެމްއެޗުން ވަނީ ބުނެފަ އެވެ.

ކޮންމެ މަހެއްގެ ދެވަނަ އަދި ހަތަރުވަނަ ހޮނިހިރު ދުވަހުގެ ހެނދުނު 10 އިން 11 އަށް ތުއްތު ދަރިފުޅު ބެލެހެއްޓުމާ ގުޅޭ ކުލާހަކާއި މެންދުރު 12 އިން އެކަކަށް ތުއްތު ދަރިފުޅަށް ގާތުން ކިރުދިނުމާ ބެހޭ ކުލާހެއް ބެއްވުމަށް ވަނީ ނިންމާފަ އެވެ.

އެ ކުލާސްތައް ބޭއްވުމަށް ހަމަޖެހިފައި ވަނީ އާރްއެޗްސީ (މީޓިން ރޫމް) ގައެވެ. އައިޖީއެމްއެޗުން ބުނީ ކްލާސް ފެށުމަށް ހަމަޖެހިފައިވާ ގަޑިއަށް އައުމުން ކޮންމެ މީހަކަށް ވެސް ކްލާހުގައި ބައިވެރިވުމުގެ ފުރުސަތު ދެވޭނެ ކަމަށެވެ.