މިއަދު ފެށުނު ރައްޔިތުންގެ މަޖިލީހުގެ ތިންވަނަ ދައުރުގެ ފުރަތަމަ ޖަލްސާގައި ވާހަކަ ދައްކަވަމުން އިލްޔާސް ވިދާޅުވީ އަޑީކާޑާއި އަދިވެސް (ދައުލަތުން) ބޭނުންވާ އެހެން ކާޑުތައް ކައުންސިލްތަކުން ހެދެން ޖެހޭނެކަމަށެވެ.
އައިޑީ ކާޑު ހެދުމުގައި މިހާރު ކަންކުރާ އުސޫލަކީ، އެރަށަކުން އެމީހަކާ ބެހޭ މައުލޫމާތު އެއްކުރުމަށްފަހު ޑިޕާޓްމެންޓް އޮފް ނެޝަނަލް ރެޖިސްޓްރޭޝަނަށް ފޮނުވުމެވެ. އެއަށްފަހު އެޑިޕާޓްމެންޓުން އައިޑީ ކާޑްތައް ހެދުމަށްފަހު އެރަށަކަށް ފޮނުވަނީއެވެ. ދެން އެމީހަކު ކައުންސިލަށް ގޮސް އައިޑީ ކާޑުލިބިގަންނަނީއެވެ. މިހެން އައިޑީކާޑު ހަދަން ޖެހުމުން ބައެއް ފަހަރު ލަސްތަކެއް ދިމާވެއެވެ.
އިލްޔާސް ވިދާޅުވީ ލާމަރުކަޒީ ނިޒާމެއްގައި އޮންނަން ޖެހޭ ގޮތަކީ އެއީ ނޫންކަމަށާއި އެމީހެއްގެ އައިޑީކާޑު އެކައުންސިލަކުން ނިންމެން ޖެހޭ ކަމަށެވެ. އަދި ކޮވިޑް ތެރޭގައިވެސް އޮން ލައިންކޮށް މަސައްކަތް ކުރެވޭކަން މިގައުމު ވެސް ތަޖްރިބާ ކޮށްފައިވާ ކަމަށާއި، އެހެން ކަމްުން މިޒަމާނުގައި އެކަން އެގޮތަށް ކުރެވެން ވާނެ ކަމަށެވެ.
އުފަންވުމާއި މަރުވުން ރަޖިސްޓްރީ ކުރުމާއި، އަދި އުފަންދުވަހުގެ ސެޓްފިކެޓާއި ދިވެހިރައްޔިތެއްކަން އަންގައިދޭ ކާޑު ހެދުމާބެހޭ ބިލަށް ވާހަކަ ދައްކަވަމުން، އިލްޔާސް ވިދާޅުވީ އެކުއްޖަކު އުފަންވާ ހޮސްޕިޓަލަުން ނުވަތަ ސިއްހީ މަރުކަޒަކުން އެކުއްޖެއްގެ އުފަންދުވަހުގެ ސެޓްފިކްޓްގެ ކަންކަން ނިމިގެން ދާން ޖެހޭނެ ކަމަށެވެ.
މިއަހަރުގެ ތިންވަނަ ދައުރުގެ ޖަލްސާތައް މިއަދު ފެށުނު އިރު ސަރުކާރުގެ ފަރާތުން ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރަށް ހުށަހެޅުމަށް ގަސްދުކުރާ ބިލުތަކުގެ ލިސްޓު، ރައްޔިތުންގެ މަޖިލީހަށް ހުށަހެޅުމަށްޓަކައި ސަރުކާރުގެ ފަރާތުން މިއަދުވަނީ ފޮނުވާފައެވެ.
ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރަށް ހުށަހެޅުމަށް ސަރުކާރުން ގަސްދުކުރާ ބިލުތަކުގެ ތެރޭގައި އެކި ދާއިރާތަކުން ޖުމްލަ 32 ބިލެއް ހިމެނެއެވެ. އޭގެ ތެރޭގައި، ޤާނޫނީ އަދި ޝަރުޢީ ދާއިރާއާ ގުޅުންހުރި ބިލުތަކާއި، ދީނީ އަދި އިޖްތިމާޢީ ދާއިރާއާގުޅޭ ބިލުތަކާއި، އިގްތިސާދީ އަދި ތިމާވެށީގެ ދާއިރާއާގުޅޭ ބިލުތައް ހިމެނެއެވެ.
