ކ. ރަސްފަރީ އަކީ ޓެލެކޮމިއުނިކޭޝަންސްގެ މަސައްކަތް ކުރާ ރަށެކެވެ. މި ރަށުގެ ހުޅަނގު ފަރާތަށް 190 މީޓަރުގެ އާގު ބޯޓެއް ފަރަށް އަރައިގެން ހާދިސާގެ މައުލޫމާތު އެމްއެންޑީއެފް ކޯސްޓްގާޑް މެރިޓައިމް ރެސްކިއު ކޯޑިނޭޝަން ސެންޓަރު (އެމްއާރުސީސީ) އަށް ލިބިފައިވަނީ މިއަދު 12:48 ހާއިރުއެެވެ. ހާދިސާގެ މައުލޫމާތު ލިބުމާއެކު އެމްއެންޑީއެފް މާލޭ އޭރިއާ ކޯސްޓްގާޑް ސްކޮޑްރަންއިން ވަނީ ހަރަކާތްތެރިވާން ފަށާފައެވެ.
އެމްއެންޑީއެފްއިން ބުނީ އެ ބޯޓަކީ އިންޑިއާއިން ފުރައިގެން ސައުތު އެފްރިކާއަށް ދަތުރުކުރި ބޯޓެއް ކަމަށެވެ. 19 ފިލިޕީންސް މީހުނާއެކު ދަތުރުކުރި އެ އާގު ބޯޓު ފަރަށް އަރައިފައިވަނީ ކ.ރަސްފަރި ކައިރިން އިންޖީން ހުއްޓުމުގެ ސަބަބުން ކަމަށް އެމްއެންޑީއެފްއިން މައުލޫމާތު ދެއެވެ.
ޕެނަމާގައި ރަޖިސްޓްރީކޮށްފައިވާ މި ބޯޓު ފުންކުރުމުގެ މަސައްކަތުގައި ބޯޓުގެ ވެރިފަރާތާއި އަދި ސަރުކާރުގެ ގުޅުންހުރި އިދާރާތަކާ ގުޅިގެން ކޯސްޓްގާޑުން އަންނަނީ ހަރަކާތްތެރިވަމުންނެވެ.
ފަރަށް އެރި ވަގުތު ބޯޓުގައި މާގިނަ މުދަލެއް ނެތް ކަމަށް ވެއެވެ.
މީގެ ކުރިން މިގޮތަށް ފަރަށް އެރި ބޯޓުތަކުގެ ސަބަބުން ތިމާވެއްޓަށް ބޮޑެތި ގެއްލުންތަކެއް ލިބިފައިވެއެވެ. އަދި އެކަމާއި ގުޅިގެން އެ ފަރާތްތައް ބޮޑެތި އަދަދުތަކުން ޖޫރިމަނާކޮށްފައިވެއެވެ.
ނަމަވެސް މި އަދު ފަރަށް އެރި މިބޯޓަށް އެފަދަ ފިޔަވަޅެއް އަޅާފައިވާކަން އަދި ހާމަކޮށްފައެއް ނުވެއެވެ.
