ކެރިބިއަންގެ ފަގީރު ގައުމެއް ކަމަށްވާ ހެއިޓީއަށް އެރި ބިންހެލުމުގެ ސަބަބުން މިހާތަނަސް 2،100 މީހުން މަރުވެފައިވާއިރު އެތައް ހާސް ބަޔަކަށް ހޮސްޕިޓަލްތަކުގައި ފަރުވާދެމުންދެއެވެ.
ގޭންގު ކުށްތައް ހައްދުފަހަނަ އަޅައިގޮސްފައިވާ ހެއިޓީގައި މިހާލަތުގައި ވެސް ފަރުވާކުރަންތިބި ދެ ޑޮކްޓަރަކު ރަހީނުކުރުމުން ގިނަ ބަޔަކު އަންނަނީ އެކަމާ ކަންބޮޑުވުން ފާޅުކުރަމުންނެވެ.
އެގޮތުން ބޭނުންވާ އަސާސީ އިންފްރާސްޓްރަކްޗާ ނެތް އެގައުމުގެ ވެރިރަށް ޕޯޓު-އައު-ޕްރިންސްގެ އެންމެ ބޮޑު އެއް ހޮސްޕިޓަލުން ދެ ޑޮކްޓަރަކު ރަހީނުކުރުމުން އެކަމާ ދެކޮޅަށް މުޒާހަރާ ކުރުމުގެ ގޮތުން ހޮސްޕިޓަލް ވަނީ ދެ ދުވަސް ވަންދެން ބަންދުކޮށްފައެވެ.
އެއާއެކު ފަރުވާއެއް ނުލިބޭ މީހުންގެ އަދަދު ވަނީ އިތުރުވެފައެވެ.
ހެއިޓީގެ ސިވިލް ޕްރޮޓެކްޝަން އެޖެންސީ ބުދަ ދުވަހު ބުނީ ބިންހެލުމުގައި މަރުވިމީހުންގެ އަދަދު 2،189 ގައި އުޅޭއިރު އަނިޔާ ލިބުނު މީހުންގެ އަދަދު އުޅެނީ 12،268 ގައި ކަމަށެވެ.
މީހުން ވަގަށް ނެގުމުގެ ސަބަބުން ބިންހެލުމާ ގުޅިގެން މީހުންނަށް އެހީތެރިކަން ފޯރުކޮށްދިނުމަށް މަސައްކަތައް ވަނީ އިތުރު ގޮންޖެހުންތަކާއި ކުރިމަތިވެފައެވެ.
ހެއިޓީއަށް އައި 7.2 މެގްނިޓިއުޑްގެ ބިންހެލުމުގައި 100،000 އަށްވުރެ ގިނަ ގެތައް ހަލާކުވެ، 30،000 އާއިލާގެ ގެދޮރުނެތިދިޔަ އެވެ. ހޮސްޕިޓަލްތަކާއި ސްކޫލްތަކާއި ސަރުކާރު އޮފީސްތަކަށް ވެސް ބޮޑެތި ގެއްލުން ލިބިފައިވެއެވެ.
