ބޯޓު ފަރަށް އެރުމާއި ގުޅޭ ގޮތުން ޓްރާންސްޕޯޓް އޮތޯރިޓީން ނެރުނު ބަޔާނެއްގައި ބުނެފައިވަނީ ބޯޓު ފުން ކުރުމަށް ކުރަންޖެހޭ މަސައްކަތް ބޯޓުގެ ވެރިފަރާތާއި ސަރުކާރުގެ މުއްސަސާތައް ގުޅިގެން ކުރިއަށް ގެންދާ ކަމަށެވެ.
މައުލޫމާތު ލިބިފައިވާ ގޮތުގައި ބޯޓު ފުންކުރުމުގެ މަސައްކަތަށް ލަންކާއިން ޓަގު ބޯޓެއް ގެނައުމަށް ވަނީ ހަމަޖެހިފައެވެ.
މި ބޯޓު ރަސްފަރި ފަރަށް އަރާފައިވަނީ ދިޔަ ބުރާސްފަތި ދުވަހުގެ ރޭ ފަތިހު 3:00 ހާއިރު އެވެ. އޭރު ބޯޓު ދަތުރު ކުރަމުން ދިޔައީ އިންޑިއާގެ ޓުޓިކޮރިން ބަނދަރުން، އެފްރިކާ ބައްރަށް ކަމަށް ޓްރާންސްޕޯޓުން މައުލޫމާތު ދެއްވައެވެ.
ޓްރާންސްޕޯޓުން ވިދާޅުވީ ބޯޓު ފަރަށް އެރުމާއި ގުޅިގެން ބޯޓު ތެޔޮ ލީކުވުން ފަދަ ކަމެއް ދިމާވެފައިނުވާ ކަމަށެވެ.
ރަސްފަރި ފަރަށް ބޯޓު އަރަން މެދުވެރިވީ ބޯޓުގެ އިންޖީނު ފެއިލްވެ، ބޯޓު އޮޔާދިއުމުގެ ސަބަބުންނެވެ.
