މިދިޔަ މެއި މަހުގެ ހައެއް ވީ ބުރާސްފަތި ދުވަހު ރޭ 20:25 ހާއިރު އެއްޗެއް ގޮވާލާގެން ދިން އެ ހަމަލާގައި ރައީސް ނަޝީދަށް ލިބިފައިވާ ޒަހަމުތަކަށް ފަރުވާދިނުމަށް އޭޑީކޭ ހޮސްޕިޓަލުގައި ހަތަރު ސާޖަރީއެއް ހަދާފައިވެއެވެ. ފުރަތަމަ ސާޖަރީ ހަދާފައިވަނީ ބޮލަށް ލިބިފައިވާ ޒަހަމުތަކަށް ފަރުވާދިނުމަށެވެ. އެޔަށްފަހު ހެދި ސީޓީ ސްކޭންއިން އިތުރު ޒަހަމުތަކެއް ފާހަގަވުމުން މޭ ގެ އިތުރުން ގޮހޮރު އަދި މޭކަށީގެ ސާޖަރީއެއްވެސް ހަދާފައިވެއެވެ.
އޭގެފަހުން ބޭރަށް އިތުރު ފަރުވާއަށް ވަޑައިގެން ފައިގެ އިތުރު ދެ ސާޖަރީއެއް މިހާތަަނަށް ހައްދަވާފައިވެއެވެ. އަދި އެގޮތުން ހަަމަލާގައި ކަނާއަތް ފަރާތު ތިން އިގިއްޔަށް ލިބުނު އަނިޔާގެ ސަބަބުން އެ އިގިލިތަކުގެ ހިއްސު ކެނޑިފައިވާ ކަމަށާއި، އެއިގިލިތަކުގެ އިހްސާސް ނުކުރެވޭކަމަށް ރައީސް ނަޝީދު ވިދާޅުވާ ކަމަށް ކޮށްކޯފުޅު ނާޒިމް ސައްތާރު މީގެ ކުރިން ވިދާޅުވިއެވެ. އަދި ވައަތް ފަރާތުގެ ކަންފަތުގެ ތޫރިއަށްވެސް ގެއްލުންތަކެއް ލިބިފައިވުމުން އެ ކަންފަތައް އަޑުއިވުމުގައިވެސް މައްސަލަތަކެއް ދިމާވަމުންދާކަމަށް ނާޒިމް ވިދާޅުވިއެވެ. އޭގެ އިތުރުން ވައަތު ފައިތިލާއަށް ލިބިފައިވާ ޒަހަމުތަކަށް ފަރުވާކުރުމަށް އެތަން ކޮނެލުމަށްފަހު ސާފުކޮށް، ފައިތިލައިގެ ފާރުގަނޑު ފަސޭހަކުރުމަށް ފަލަމަސްގަނޑުން ހަން ނަގާ ޒަހުމުވި ބައިގައި އަޅާފައިވާކަމަށް ނާޒިމް ވިދާޅުވިއެވެ.
މިއަދު އޮންލައިންކޮށް ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ އިގިލިތަކަށް ލިބިފައިވާ ޒަހަމު ފިޔަވައި ގާތްގަނޑަކަށް މުޅިން ފަސޭހަ ވެފައިވާ ކަމަށެވެ. ނަމަވެސް އިގިލިތަކަށް ލިބުނު ޒަހަމުގެ ސަބަބުން ބައެއް އިގިލިތަށް އައްސިވެފައި ހުންނާތީ އެކަަމަށް ޑޮކްޓަރުންގެ ލަފައާއިއެކު ފަރުވާ ދެމުންދާ ކަމަށެވެ. ނަމަވެސް އިގިލިތަކަށް ލިބިފައިވާ އަނިޔާ މުޅިން ރަނގަޅުވުމަށް ކުރެވޭ އުންމީދަކީ ފަނޑު އުންމީދެއް ކަމަށް ވިދާޅުވިއެވެ.
ހަމަލާގެ ސަބަބުން ލިިބުނު ޒަހަމުތަކުގެ "ދިޔަ" ނަގަން ބޭނުންވޭތޯ ސުވާލުކުރުމުން ރައީސް ނަޝީދު ވިދާޅުވީ ބޭނުންވާ ކަމަށެވެ. ނަމަވެސް އެކަންތަކާއި ބެހޭ ގޮތުން އެއްޗެއް ސާފުކޮށްދޭން އެގޭނީ އެމަނިކުފާނުގެ ކަމަށް ވިދާޅުވިއެވެ.
ދިޔަ ހޯދަން ދައުވާ ކުރުމަށް ބޭނުންވާ ލިޔުންތައް ލިބިއްޖެތޯ ކުރި ސުވާލަށް ޖަވާބު ދެއްވަމުން ނަޝީދު ވިދާޅުވީ، އެކަމަށް ބޭނުންވާ ލިޔުންތައް ޕީޖީ އޮފީހުން އަދި ފުލުހުން ވެސް ދެއްވާނެ ކަމަށް ގަބޫލުކުރައްވާ ކަމަށެވެ. އެއީ އެ ފަރާތްތަކުން ހުރަސްއަޅާނެ ކަމެއް ނޫން ކަމަށް ދެކެވަޑައިގަންނަވާ ކަމަށް ވެސް ވިދާޅުވި އެވެ.
މެއިމަހުގެ ހަ ވަނަ ދުވަހު ނިލޯފަރުހިނގުމުގައި ރައީސް ނަޝީދަށް އަމާޒުކޮށް ދިން ޓެރަރިސްޓު ހަމަލާގައި އެމަނިކުފާނުގެ ހަށިކޮޅަށް ލިބުނުގެއްލުންތަކުގެ ތަފްސީލު ހިއްސާކުރައްވާ މެއި މަހުގެ އަށްވަނަ ދުވަހު އޭޑީކޭ ޑޮކްޓަރުންގެ ޓީމުން ބޭއްވި ނޫސްވެރިންގެ ބައްދަލުވުމުގައި އޭޑީކޭ ހޮސްޕިޓަލުގެ ޗީފް މެޑިކަލް އޮފިސަރު ޑރ. ނިޔާފް ވިދާޅުވެފަވަނީ، ރައީސް ނަޝީދު އޭޑީކޭ ހޮސްޕިޓަލަށް ގެނެވުނީ އަނިޔާތަކަކާއިއެކު މެއި މަހުގެ ހަވަނަ ދުވަހުގެ ރޭގެ 20:30ހާއިރު ކަމަށެވެ. އެވަގުތަކީ އެއީ ޑރ. ނިޔާފްވެސް ހޮސްޕިޓަލުތެރޭގައި ހުންނެވި ވަގުތެއްކަމަށާއި، ރައީސް ނަޝީދު ހޮސްޕިޓަލުގެ އެމަޖެންސީ ރޫމަށް ގެނެވުމާއިއެކު ހަރަކާތްތެރިވާން ފެށުނުކަމަށް ޑރ. ނިޔާފް ވިދާޅުވިއެވެ.
ރައީސް ނަޝީދު ފުރަތަމަ ގެނެވުނުގެ ހާލަތާއި އެޓެންޑުކުރިގޮތް ސާފުކޮށްދެއްވަމުން ޑރ. ޓީމުން ވިދާޅުވެފައިވަނީ އެންމެ ފުރަތަމަ ގެނެވުނުއިރު ހެޔަށް ގޮތްވެފައި ނުވާކަމަށާއި ނަމަވެެސް މީހާއަށް ވަރަށްބޮޑަށް އުދަގޫވެފައިވާކަމަށް ދައްކާކަމަށެެވެ. އެހެންކަމުން ފުރަތަމަ ޕްރައިމެރީ ސާވޭއެއް ހެދުނު ކަމަށާއި، ހަށިގަނޑުގެ ވަރަށް ގިނަ ތަންތަނުން ލޭއަންނަކަން ފާހަގަކުރެވުނު ކަމަށް ނިޔާފް ވިދާޅުވިއެވެ.
އޮޕަރޭޝަން ތިއޭޓަރަށް ބަދަލުކޮށް ފުރަތަމަވެސް މަސައްކަތްކުރީ އެންމެ ބޮޑަށް “ބްލީޑް” ވަމުން އަންނަ ތަންތަނުން ލޭމަނާކުރުމަށް ކަމަަށް ޑޮކްޓަރުންގެ ޓީމުން ބުނެފައިވެއެވެ. އެޔަށްފަހު ސީޓީ ސްކޭންއެއް ހެއްދުނު ކަމަށާއި، އެ ސްކޭންއިން ހަށިގަނޑުގެ އެތެރެއަށް ލިބިފައިވާ ގިނަ އަނިޔާތަކެއް ދެނެގަނެވުނު ކަމަށް ޑޮކްޓަރުންގެ ޓީމުން ވިދާޅުވިއެވެ.
އެޕްރެސްތެރޭ އަނިޔާތައް ފެންނަ އިމޭޖެއްވެސް ނޫސްވެރިންނަށް ދައްކާލާފައިވާއިރު، އެ އިމޭޖްގައި ވަނީ ރަތްކުލައިންނާއި ނޫކުލައިން ގިނަ ޒަހަމުތަކެއް ފާހަގަކޮށްފައެވެ. ރައީސް ނަޝީދުގެ ހަށިކޮޅުގެ ހުރިހާ ދިމާލަކަށް އެކިވަރުގެ އަނިޔާތައް ލިބިފައިވާކަން އެ އިމޭޖުން ފާހަގަކޮށްފައިވެއެވެ.
އެގޮތުން ރަތްކުލައިން ފާހަގަކޮށްފައިވަނީ ހަށިގަނޑުގެ ބޭރުފުށުން އެތައް މިތަނަށް ލިބުނު ބޮޑެތި އަނިޔާތަކެެވެ. މި އަނިޔާތައް ބޮލާއި، ބަޑަށް، އަތަށް، އަދި ފަޔަށްވެސް ލިބިފައިވެއެވެ. އަދި މަޑު ނޫކުލައިން ފާހަގަކޮށްފައިވަނީ ހަށިގަނޑުގެ އެތެރެއަށް ވަދެފައިވާ ދަނގަޑުފާޑުގެ އެއްޗެހިތަކުން ޒަހަމުވެފައިވާ ތަންތަނެވެ. އޭގެއިތުރުން ގަދަ ނޫކުލައިން ފާހަަގަކޮށްފައިވަނީ ކަފައިގެން ގޮސްފައިވާ ތަންތަނަށް ވަދެފައިވާ ޕްލާސްޓިކްފަދަ އެއްޗެހި ކަމަށް ޑޮކްޓަރުންގެ ޓީމުން ވިދާޅުވިއެވެ.
