Advertisement

ފަރަށް އެރި ދޯނިން ގެއްލުނު މީހާ ހޯދުމަށް ކޯސްޓު ގާޑުގެ ޑައިވަރުން ކުރި މަސައްކަތުން އެ ސަރަހައްދުން މާސްކަކާއި ބޮކްސާ ވައްތަރުގެ ސޯޓެއް ފެނިފައިވާ ކަމަށް އެމްއެންޑީއެފުން ބުނެފި އެވެ.

ފަރަށް އެރި މުދާ އުފުލާ ދޯންޏެއްގައި ހުރި މީހަކު ގެއްލިގެން ސިފައިން އެމީހާ ހޯދުމުގެ މަސައްކަތް ފެށީ މިއަދު ހެނދުނު އެވެ.

މިމަސައްކަތުގެ މައުލޫމާތު ހިއްސާކުރައްވަމުން އެމްއެންޑީއެފްގެ ކެޕްޓަން އިބްރާހީމް އާޒިމް ވިދާޅުވީ ގެއްލުނު މީހާ ހޯދުމުގެ މަސައްކަތުގެ ތެރޭގައި އެ ސަރަހައްދުން ބޮކްސާ ވައްތަރުގެ ސޯޓަކާއި މާސްކެއް ޑައިވަރުންނަށް ފެނިފައިވާ ކަމަށެވެ.

ތިން މީހުންނާ އެކު ދަތުރުކުރަމުން ދަނިކޮށް ކ. ކަގި ކައިރި ފަރަށް އަރާފައިވަނީ "ޓީޓީއެސް ފާން" ކިޔާ ދޯންޏެކެވެ.

މި ދޯނި ފަރަށް އެރި ކަމުގެ މައުލޫމާތު ލިބުނީ މިއަދު ހެނދުނު 8:09 ހާއިރު ކަމަށްވެސް އެމްއެންޑީއެފުން މައުލޫމާތުދެ އެވެ.

އެމްއެންޑީއެފުން ބުނީ ދޯނި ފަރަށް އެރިއިރު ދޯނީގައި ތިބީ ތިން މީހުން ކަމަށެވެ. އެއީ ދެ ބިދޭސީންނާއި ދިވެއްސެއް ކަމަށްވެސް އެމްއެންޑީއެފުން މައުލޫމާތުދެ އެވެ.

އެމްއެންޑީއެފުން ބުނީ ގެއްލިގެން ހޯދަނީ އުމުރުން 37 އަހަރުގެ ދިވެހި މީހާ ކަމަށާއި އޭނާ އަކީ ދޯނީގެ ކައްޕި ކަމަށެވެ.

ސީއެންއެމްއަށް އެނގިފައިވާ ގޮތުގައި ގެއްލިގެން ހޯދާ މީހަކީ ކުޅުދުއްފުށީ ހަވީރީނާޒް، މުހައްމަދު ޔޫސުފް އެވެ.

އެމްއެންޑީއެފުން އިތުރަށް ބުނީ ކައްޕި ގެންގުޅުނު ބޭގައި ފޯން ދޯނީގައި އޮތް ކަމުގެ މައުލޫމާތު ލިބިފައިވާ ކަމަށެވެ.