ސީއެޗްއެސްއީން ބުނިގޮތުގައި ސުއޫދު ވަނީ އިއްޔެ ވެސް ސްކޫލަށް ގޮސް މަސައްކަތް ކޮށްފަ އެވެ. އޭނާ ކުއްލި ގޮތަކަށް މަރުވީ، ނިދާފައި އޮއްވައި ނޭވާ ލާން އުނދަގޫވެގެން ހޮސްޕިޓަލަށް ގެންދިޔަތާ މާ ގިނައިރުތަކެއް ނުވެ ރޭ ފަތިހު އެވެ.
ސުއޫދު، 52، ސީއެޗްއެސްއީއާ ގުޅުނީ މީގެ 19 އަހަރު ކުރިންނެވެ. އޭނާ ވަނީ އެ ސްކޫލުގެ އިސްލާމް ޑިޕާޓްމަންޓްގެ ހެޑްގެ ގޮތުގައި ވެސް މަސައްކަތްކޮށްފަ އެވެ.
ސުއޫދު އަކީ ވަރަށް މަޑުމައިތިރު ކުދިންނާ ގުޅޭ ޓީޗަރެކެވެ.
ސުއޫދު މަރުވި އިރު އޭނާ އައީ ސީއެޗްއެސްއީގެ އިސްލާމް ޓީޗަރެއްގެ އިތުރުން އިސްލާމިކް ޔުނިވާސިޓީގެ ޕާޓް ޓައިމް ލެކްޗަރާއެއްގެ ގޮތުގައި މަސައްކަތް ކުރަމުންނެވެ. ސުއޫދު ވަނީ ކުރީގެ އެމްއީއެސް އާއި އަމީނިއްޔާ ސްކޫލުގައި އިސްލާމް ޓީޗަރެއްގެ ގޮތުގައި ވެސް މަސައްކަތް ކޮށްފަ އެވެ.
ސުއޫދު މަރުވުމާ ގުޅިގެން އެޑިއުކޭޝަން މިނިސްޓްރީން ނެރުނު ބަޔާނެއްގައި ބުނެފައި ވަނީ އެއީ ތައުލީމީ ދާއިރާ އަށް ލިބުނު ވަރަށް ބޮޑު ގެއްލުމެއް ކަމަށެވެ.
