ފުލުހުން ބުނިގޮތުގައި މަކަރާއި ހީލަތުން މީހެއްގެ އަތުން ފައިސާ ހޯދާފައިވާކަމަށް ތުހުމަތުކުރެވޭ މައްސަލާގައި ހޯދަމުންދަނީ އުމުރުން 22 އަހަރުގެ ސ. މަރަދޫ، ޒީނިޔާމަންޒިލް، ހައްވާ ސައުޒާ އެވެ.
އޭނާ ހޯދުމަށް އިއުލާނުކުރީ އެ މައްސަލާގައި ތަހުގީގަށް ހާޒިރުކުރުމަށް ބޭނުންވެގެން އޭނާ އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓް ރައްދުކުރެވިފައިނުވާތީ އާއި އާއިލާއަށް ވެސް އުޅޭ ވަކިތަނެއް އެނގިފައިނުވާތީކަމަށް ފުލުހުން ބުނެ އެވެ.
"ސައުޒާ ހޯދަން އިއުލާނުކުރީ ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައި ވާގޮތުގެ މަތިން ތަހުގީގަށް ހާޒިރުވުމަށް އަންގައި އިއުލާނުކުރަމެވެ." ސިއުޒާ ހޯދަން ފުލުހުންކޮށްފައިވާ އިއުލާނުގައި ބުނެފައިވެ އެވެ.
ފުލުހުން ބުނީ މަކަރާއި ހީލަތުން މީހެއްގެ އަތުން ފައިސާ ހޯދާފައިވާކަމަށް ތުހުމަތުކުރެވޭ މައްސަލައިގެ ތަހުގީގުގައި ސައުޒާ ހޯދަނީ ސުވާލުކުރުމަށާއި މައުލޫމާތު ސާފުކުރުމަށެވެ. ފުލުހުންގެ އިއުލާނުގައިވާގޮތުން އޭނާ ފުލުހަށް ހާޒިރުވާން އަންގާފައިވަނީ އަންނަ އޮކްޓޫބަރު މަހުގެ ފަސް ވަނަ ދުވަހުގެ 2:00 އަށް ފުލުހުންގެ މައި މަރުކަޒުކަމަށްވާ ޝަހީދު ހުސައިން އާދަމް ބިލްޑިން އަށެވެ.
