ފުލުހުން ބުނީ ފޮޓޯ އާއި ވީޑިއޯއިން ފެންނަ މީހާ ހޯދަމުންދަނީ މިދިޔަ ޖުލައި މަހުގެ 29 ވަނަ ދުވަހުގެ ވަގުތެގައި މ. ވައިޓްހައުސް ގޭގެ ސިޑި ކައިރީގައި ބަހައްޓާފައިހުރި ފޮށިގަނޑެއް ވަގަށް ނަގާފައިވާ މައްސަލައަކާ ގުޅިގެން ކަމަށެވެ.
ފުލުހުންގެ ޖެނެރަލް އިންވެސްޓިގޭޝަން ޑިޕާޓްމަންޓުން ކުރަމުންދާ ތަހުގީގަށް އެ މީހާ ހޯދުމަށް އާންމުންގެ އެހީތެރިކަމަށް ފުލުހުން އެދިކޮށްފައިވާ އިއުލާނުގައި ބުނެފައިވަނީ ހޯދަމުންދާ އެ މީހާއާ ބެހޭ އެއްވެސް މައުލޫމާތެއް ލިބިފައިވާނަމަ ޖެނެރަލް އިންވެސްޓިގޭޝަން ޑިޕާޓްމަންޓްގެ ނަމްބަރު 9631696 އަށް ގުޅައި މިމައްސަލައިގެ އިންސިޑެންޓް ނަންބަރު 493556 ބުނެވެ، އެމައުލޫމާތެއް ހިއްސާކުރެއްވުން އެދެމެވެ.
ފުލުހުން ބުނީ މިފަދަ ކަންކަމުގައި ރައްޔިތުންގެ ފަރާތުން ފުލުހުންނަށް ލިބެމުންދާ އެއްބާރުލުން ޝުކުރު އަދާކުރާ ކަމަށާއި ތަފާތު މައްސަލަތަކުގައި ހޯދަމުންދާ މީހުން ހޯދުމުގައި ވަރަށް ބޮޑު އެއްބާރުލުމެއް ލިބެމުންދާކަމަށެވެ.
ވައްކަމުގެ މައްސަލާގައި ފޮޓޯ އާއި ވީޑިއޯ އާއެކު މީހަކު ހޯދަން ފުލުހުން އިއުލާނު ކުރި އިރު، މަކަރާއި ހިލާތް ހަދައިގެން މީހަކު އަތުން ފައިސާ ހޯދު އުމުރުން 22 އަހަރުގެ އަންހެން ކުއްޖަކު ފުލުހަށް ހާޒިރުވުމަށް އަންގާ އިއުލާނެއް ވެސް ފުލުހުން ވަނީ މިއަދުކޮށްފަ އެވެ.
އެ މައްސަލާގައި ހޯދަމުންދަނީ އުމުރުން 22 އަހަރުގެ ސ. މަރަދޫ، ޒީނިޔާމަންޒިލް، ހައްވާ ސައުޒާ އެވެ. އޭނާ ހޯދުމަށް އިއުލާނުކުރީ އެ މައްސަލާގައި ތަހުގީގަށް ހާޒިރުކުރުމަށް ބޭނުންވެގެން އޭނާ އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓް ރައްދުކުރެވިފައިނުވާތީ އެވެ.
