Advertisement

މާލޭގައި މިއަހަރު މުޅިން އަލަށް އިއްޒުންދީން ސުކޫލުގެ ނަމުގައި ހުޅުވާ ސުކޫލުގެ ޕްރިންސިޕަލްގެ ބޭފުޅަކު ހަމަޖައްސައިފި އެވެ.

އެގޮތުން މިމަގާމަށް ހަމަޖައްސާފައިވަނީ ތައުލީމީ ދާއިރާގައި ގިނަ އަހަރު ތަކަކު މަސައްކަތް ކުރައްވާފައިވާ އިސްމާއީލް ނަސީރު އެވެެ.

އޭނާ އެންމެ ފަހުން ހުންނެވީ ރ. ވާދޫ ސުކޫލްގެ ޕްރިންސިޕަލްގެ މަގާމުގަ އެވެ.

އިއްޒުންދީން ސުކޫލްގެ ލޯގޯއާއި ރަސްމީ ޔުނީފޯމާއި އެކްޓިވިޓީ ޔުނީފޯމާއި އަދި ސުކޫލުގެ ކުލަ ވެސް މިހާރު ވަނީ ރަސްމީކޮށް ތައާރަފްކޮށްފަ އެވެ. \

އެޑިޔުކޭޝަން މިނިސްޓްރީން ބުނީ މިއަހަރު އެ ސްކޫލުގައި ކިޔަވައިދޭނީ ގްރޭޑު އެކަކުން 6 އަކަށް ކަމަށާއި ގްރޭޑު 7 އިން 10 އަކަށް ގްރޭޑް ތައާރަފުކުރާނީ 2021 އިން ފެށިގެން ކޮންމެ އަހަރަކުވެސް ގްރޭޑެއް އިތުރުކޮށްގެން ކަމަށެވެ.

އެއް ދަންފަޅިއަށް ކިޔަވައިދޭ ސްކޫލެއްގެ ގޮތުގައި އިއްޒުންދީން ސުކޫލު ތައްޔާރުކުރަމުންދާއިރު މި ސްކޫލުގައި ގްރޭޑު 2 އިން 6 އަކާ ދެމެދު ގްރޭޑުތަކަށް ކުދިން ވައްދަން ބޭނުންވާ ފަރާތްތަކަށް އެ ފުރުސަތު ވަނީ ހުޅުވާލާފަ އެވެ.

މިނިސްޓްރީން ބުނީ އެ ސްކޫލަަށް ދަރިވަރުން ވެއްދުމުގައި ވެސް އަމަލުކުރާނީ މާލޭގެ އެހެން ސްކޫލުތަކަށް ވެސް ދަރިވަރުން ވެއްދުމުގައި އަމަލުކުރަމުން އަންނަ އުސޫލުގެ ދަށުން ކަމަށެވެ.

އިއްޒުންދީން ސުކޫލް ހިންގުމަށް ހަމަޖައްސާފައިވަނީ ކުރީގެ މާލޭ އިންގްލިޝް ސްކޫލު (އެމްއީއެސް) ހިންގި އިމާރާތުގަ އެވެ. އެތަނުގައި ވަނީ ކުރިން މަންދު ކޮލެޖުވެސް ހިންގާފަ އެވެ. އަދި ގައުމީ ޔުނިވާސިޓީގެ އެކި ފެކަލްޓީތަކުގެ ދަރިވަރުން ވެސް އެތަނުގައި ކްލާސްތައް ވަނީ ނަގާފަ އެވެ.

މިއަހަރުގެ ދިރާސީ އަހަރުގެ ކިޔެވުން ފެށުމަށް އެޑިޔުކޭޝަން މިނިސްޓްރީން ނިންމާފައި ވަނީ މިމަހުގެ 12 ވަނަ ދުވަހު އެެވެ. އެކަމަކު ޓީޗަރުން އަންނަ މިމަހުގެ ހަތްވަނަ ދުވަހު ވަޒީފާއަށް ނިކުންނަން ޖެހެ އެވެ.

މީގެއިތުރުން މި އަހަރު ދަރިވަރުންނަށް 201 ދުވަހު ކިޔަވައި ދިނުމަށް ހަމަޖައްސާފައިވާއިރު ފުރަތަމަ ޓާމުގައި 90 ދުވަހު އަދި ދެވަނަ ޓާމުގައި 111 ދުވަހު ކިޔަވައިދިނުމަށް ވަނީ ހަމަޖައްސާފަ އެވެ.