ނާހިދާގެ ހަށިގަނޑު މާލެ ގެނެސްފައިވަނީ އެމްއެންޑީއެފް ކޯސްޓްގާޑުން ހީތެެރިކަމާއިއެކު މިއަދު ހެނދުނު 07:30 ހާއިރު އެވެ.
ހާދިސާ ހިނގުމާއިއެކު ނާހިދާ ކ. ގުރައިދޫގެ ސިއްހީ މަރުކަޒަށް ގެންދިއެވެ.
އެ ރަށު ސިއްހީ މަރުކަޒުން ރޭ ސީއެންއެމްއަށް ބުނީ ނާހިދާގެ ހަށިގަނޑު އެ މަރުކަޒަށް ގެނައި އިރުވެސް އޮތީ މަރުވެފައި ކަމަށެވެ. ނާހިދާ މަރުވެފައިވަނީ ކަނޑުވެ ލޮނު ބޮވުމުގެ ސަބަބުން ކަމަށް އެ މަރުކަޒުން ބުނެއެވެ.
ޖުމްލަ 12 މީހުންނާއިއެކު މިލޯންޗު ދަތުރުކުރަމުންދަނިކޮށް އަޑިއަށް ދިޔައީ ލޯންޗު ތެރެއަށް ބިންދާލި ބޮޑު ރާޅެއްގެ ސަބަބުންނެވެ.
ގެއްލުނު ކުޑަކުއްޖާ އެމްއެންޑީއެފް ކޯސްޓުގާޑުންނާއި، ފުލުހުން ގުޅިގެން ހޯދުމުގެ މަސައްކަތް މިހާރު ދަނީ ކުރަމުންނެވެ. އެކުއްްޖާ އަދިވެސް ފެނިފައެެއް ނުވެއެވެ.
އެކުއްޖާ ގެއްލުނުއިރު ލައިގެން ހުރީ ކަޅުކުލައިގެ ޓީޝާޓެއް ކަމަށް އެމްއެންޑީއެފުން ބުނެއެވެ.
އެކުއްޖާގެ މައުލޫމާތެއް ލިބިއްޖެނަމަ ކޯސްޓުގާޑުގެ ހިލޭ ގުޅޭ ނަންބަރު 191 އަށް ގުޅޭ މައުލޫމާތު ހިއްސާ ކޮށްދިނުން އެމްއެންޑީއެފުން އެދެއެވެ.
މި ހިތާމަވެރި ހާދިސާގައި އެކި ވަރުގެ ޒަހަމްތަކާއިއެކު އިތުރު ހަތަރު މީހަކަށް މިހާރުވެސް ގުރައިދޫ ސިއްހީ މަރުކަޒުގައި ފަރުވާދީފައިވެއެވެ.
