ތިނަދޫ ކައުންސިލްގެ ރައީސް ސައުދު އަލީ ވިދާޅުވީ އެރަށަށް ބަދަލުވާން ތައްޔާރަށް ވަރަށް ގިނަ މީހުން އެބަތިބި ކަމަށާއި، އެކަމަކު އެކަމުގައި އޮތް ހުރަހަކީ ބޯހިޔާވަހިކަން ކަމަށެވެ.
"ގިނަ މީހުން މިހާރު ބޭނުންވަނީ ގޯއްޗެއްވެސް ނޫން. ހަމަ ފްލެޓް ބޭނުންވަނީ " ސައުދު ވިދާޅުވިއެވެ.
ކައުންސިލުން ބުނީ ދަރީންނަށް ތައުލީމު ދިނުމަށްވެސް އެކި ރަށްރަށުގެ މީހުން ބޭނުންވާ ކަމަށާއި އެކަމަކުވެސް އެރަށުގައި ތިބެން ކުރަންޖެހޭ ހޭދަ ބޮޑުވުމުގެ ސަބަބަުން ފަސްޖެހެމުން ދާކަމަށެވެ.
ފްލެޓް އެޅުމުގެ ޕްރޮޖެކްޓެއް ތިނަދޫގައި ހިންގުމަށް ސަރުކާރުން ރާވާފައެއް ނުވެއެވެ. ވަގުތީ ދަފްތަރުގައި މިހާރުވެސް ތިނަދޫ ރައްޔިތުންގެ ތެރެއިން 1000 މީހުން އެބަތިއްބެވެ. އޭގެތެރެއިން ގިނަ މީހުންނަކީ ހުޅުމާލޭއިން ފްލެޓް ހޯދުމުގެ އުންމީދުގައި ތިބި މީހުން ކަމަށް ބެލެވެ އެވެ.
ކައުންސިލުން ބުނީ ފްލެޓް އެޅުމުން މީހުން ވަރަށް ބޮޑަށް އިތުރުވެ، ތަރައްގީ އަށް މަގު ހުޅުވިގެންދާނެ ކަމަށެވެ.
