ހޮޓެލް ޖެންގައި މިހާރު ކުރިއަށް ދާ ރަސްމިއްޔާތުގައި އިކޮނޮމިކް މިނިސްޓަރު ފައްޔާޒު އިސްމާއިލް ވަނީ މިނިމަމް ވޭޖް ގަރާރުގައި ސޮއިކުރައްވައިފަ އެވެ.
މަސައްކަތްތެރިންނަށް ދެވޭ އެންމެ ކުޑަ އުޖޫރަ ކަނޑައެޅުމުގައި ހަތަރު ކެޓަގަރީއަކަށް ވަނީ ބަހާލާފައެވެ.
އެގޮތުން އެންމެ ކުދި ވިޔަފާރިތަކުން މަހަކު 4500ރ، މެދު ފަންތީގެ ވިޔަފާރިތަކުން މަހަކު 7000ރ، ބޮޑެތި ވިޔަފާރިތަކުން މަހަކު 8000ރ، އަދި ސިވިލް ސާވިސް އިން މަހަކު 7000ރ ވަނީ ކަނޑައަޅާފައެވެ.
އެންމެ ކުޑަ އުޖޫރަ ކަނޑައެޅުމުގައި ބަލައިފައި އެމީހަކަށް ލިބޭ ވަނީ ފިކްސްޑް އެލަވަންސް ހިމެނޭ ގޮތަށެވެ. އެކަމަކު އޭގެ ތެރޭގައި ފުޑް އެލަވަންސް ކަހަލަ(އެކި މަސްމަހު އެކިވަރަށޤ ލިބޭ އެލަވަންސް) އިންކައިންޑް ބެނެފިޓްސް ނުހިމެނެ އެވެ.
"ފަތުރުވެރިކަމުގައި ހިމެނޭ ގާތްގަނޑަކަށް 13،000 މުވައްޒަފުންނަށް މިއިން ރަނގަޅުވާނެ،" މި ރަސްމިއްޔާތުގައި ވާހަކަ ދައްކަވަމުން ފައްޔާޒް ވިދާޅުވި އެވެ.
މިނިސްޓަރު ވިދާޅުވީ މިނިމަމް ވޭޖްގެ ސަބަބުން ޓޫރިޒަމްދާއިރާގެ ގިނަ އަދަދެއްގެ ދިވެހި މުވައްޒަފުންގެ މުސާރައަށް ހެޔޮ ބަދަލެއް އަނނާނެ ކަމަށެވެ. އެގޮތުން އެދާއިރާގައި މަސައްކަތް ކުރާ އެންމެ އާދައިގެ މުވައްޒަފަކަށް ވެސް އެންމެ ކުޑަވެގެން 12000 ރުފިޔާ ލިބޭނެ ކަމަށް މިނިސްޓަރު ވިދާޅުވިއެވެ.
