މައުލޫމާތު ހޯދާ ލިބިގަތުމުގެ ގާނޫނުގެ ދަށުން، އެފަދަ މައުލޫމާތު ހޯއްދަވައި އާއްމު ކުރައްވަމުން އަންނަ އައިމަން ލަތީފް މިއަދު ކުރެއްވި ޓްވީޓެއްގައިވަނީ ރޮހިންގާ މުސްލިމުންނަށް އެހީތެރިވުމަށް ދެހާސް ސަތާރަވަނަ އަހަރު އެފްއޭއެމުން ހިންގި ޗެރިޓީ ހަރަކާތަށް ލިބުނު ފައިސާތަކެއް ގެއްލުނުކަމާ ގުޅޭ ގޮތުން ރައްޔިތުންގެ މަޖިލީހުގެ މާލިއްޔަތު ކޮމިޓީގައި ހިނގި މަޝްވަރާއެއްގެ ޓްރާންސްކްރިޕްޓް އާއްމު ކުރައްވާފައެވެ.
މި މަޝްވަރާ ބައްދަލުވުމުގެ ރެކޯޑިންގ ރައްޔިތުންގެ މަޖިލީހުގެ ޔޫޓިއުބް ޗެނަލްގައި މިހާރުވެސް އެބައޮތެވެ. އެއީ މި އަހަރުގެ އޮގަސްޓް މަހު އޮތް ބައްދަލުވުމެކެވެ. މި ބައްދަލުވުމުގައި ރައްޔިތުންގަ މަޖިލީހުގެ މާލިއްޔަތު ކޮމިޓީގެ މުގައްރިރު އަދި ކިނބިދޫ ދާއިރާގެ މެންބަރު މުހައްމަދު ނާޝިޒު ދެއްކެވި ވާހަކަފުޅުން އެނގޭ ގޮތުގައި ރޮހިންގާ މުސްލިމުންނަށް އެހީތެރިވުމުގެ ނަމުގައި އެފްއޭއެމުން ހިންގި ހަރަކާތްތަކުން ލިބުނު ފައިސާގެ ތެރެއިން ބައެއް ވީނުވީއެއް ނޭނގި ގެއްލިފައެވެ. އަދި މިކަން އޭސީސީން ތަހުގީގު ކުރިކަންވެސް ނާޝިޒުގެ ވާހަކަފުޅުން އެނގެއެވެ.
ރޮހިންގާ މުސްލިމުންނަށް އެހީތެރިވުމުގެ ގޮތުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)އިން އިންތިޒާމުކޮށްގެން ގައުމީ ފުޓްބޯޅަ ދަނޑުގައި ދެހާސް ސަތާރަވަނަ އަހަރު ހިންގި މި ހަރަކާތްތަކަށް ތިން މިލިއަނަށް ވުރެ ގިނަ ރުފިޔާ ލިބިފައިވާ ކަމަށް އެފްއޭއެމުން އޭރު ބުންޏެވެ.
ރޮހިންގާ ޗެރިޓީ މެޗުގައި ވިއްކި ރައީސް ޔާމީންގެ ޖަރޒީ
ރޮހިންގާ މުސްލިމުންނަށް އެހީތެރިވުމުގެ ގޮތުން އެފްއޭއެމުން އިންތިޒާމުކޮށްގެން އެ ފަހަރުވަނީ ޗެރެޓީ ހަތަރު މެޗެއް ކުޅެފަ އެވެ. އެއީ އެ މެޗުތަކުގައި ކެބިނެޓުގައި އޭރު ތިއްބެވި މިނިސްޓަރުންގެ ޓީމަކާއި މަޖިލިސް މެންބަރުންގެ ޓީމަކާއި ސަރުކާރުގެ ކުންފުނިތަކުގެ މެނޭޖިން ޑިރެކްޓަރުންގެ ޓީމަކާއި ފިލްމީ ތަރިންގެ ޓީމެއްގެ އިތުރުން ގައުމީ ފުޓްބޯޅަ ޓީމާއި ވެޓަރަންސް ޓީމެއް ވަނީ ބައިވެރިވެފަ އެވެ. މި މެޗްތަކުގައި ކުޅުނު ކުޅުންތެރިންގެ ޖާޒީތައް ވެސް ވަނީ ބޮޑެތި އަގުތަކުގައި ނީލަން ކިޔާފަ އެވެ. އަދި މެޗްތައް ހިނގަމުން ދިޔައިރު ދަނޑުގައި ވަނީ ފަންޑު ފޮއްޓެއްވެސް ބަހައްޓާފަ އެވެ.
ރޮހިންގާ ޗެރިޓީ މެޗުގެ ތެރެއިން
އެފްއޭއެމުން އޭރު ބުނެފައިވަނީ އެ އިވެންޓުގައި އެންމެ އަގުބޮޑުކޮށް ވިއްކާލާފައިވަނީ އަށާރަ ނަންބަރު ޖަހާފައިވާ ރައީސް އަބްދުﷲ ޔާމީން އަބްދުލްގައްޔޫމްގެ ޖާޒީ ކަމަށެވެ. މި އިވެންޓް އިންތިޒާމްކުރުމުގައި އެފްއޭއެމްގެ ފަރާތުން އިސްކޮށް އުޅުނީ ޖެނެރަލް ސެކެއްޓްރީ ހުސެއިން ޖަވާޒުއެވެ. އެފްއޭއެމްގެ ރައީސަކަސް އޭރުވެސް ހުރީ ބައްސާމް އަދީލް ޖަލީލްއެވެ.
