ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނުން އާއްމުކޮށްފައިވާ ތަފާސް ހިސާބުތަކުން ދައްކާ ގޮތުން، 2019 ވަނަ އަހަރު ޅ. އަތޮޅުގެ 4 މެޖިސްޓްރޭޓް ކޯޓަކަށް 403 މައްސަލައެއް ހުށަހެޅުނެވެ. އެއީ އޮޅުވެލި ފުށީ މެޖިސްޓްރޭޓް ކޯޓާއި، ހިންނަވަރު، ނައިފަރު އަދި ކުރެއްދޫ މެޖިސްޓްރޭޓް ކޯޓަށް ހުށަހެޅުނު މައްސަލަތަކެވެ.
މި 4 މެޖިސްޓްރޭޓް ކޯޓުން 2019 ވަނަ އަހަރު 495 މައްސަލަ ނިންމާފައިވެއެވެ. މިއީ ކޭސް ކްލިއަރެންސް ރޭޓަށް ބަލާނަމަ، ސަތޭކަ ތޭވީސް ޕަސެންޓެވެ. މިއީ ނިސްބަތުން 2019 ވަނަ އަހަރުގެ ރެކޯޑެކެވެ. 2018 ވަނަ އަހަރުވެސް ނިސްބަތުން އެންމެ ގިނަ މައްސަލަ ނިންމި ޖުޑީޝަލް ދާއިރާގެ ރެކޯޑް އޮންނަ ޅ. އަތޮޅުން 2018 ވަނަ އަހަރުވަނީ ސަތޭކަ ހަތާވިސް ޕަސެންޓާއި އެކު ކޭސް ކްލިއަރެންސް ރޭޓުގެ އެންމެ ކުރީގައެވެ.
ޖުޑީޝަލް އެޑްމިނިސްޓްރޭޝަނުން އާއްމު ކުރި ތަފާސް ހިސާބުތަކުން ދައްކާ ގޮތުގައި މެޖިސްޓްރޭޓް ކޯޓުތަކަށް 2019 ވަނަ އަހަރު 10624 މައްސަލަ ހުށަހެޅިފައިވެއެވެ. ކުރީ އަހަރުތަކުގެ ނުނިމި ހުރި މައްސަލަތަކާއި އެކު 14908 މައްސަލައެއް 2019 ވަނަ އަހަރު މެޖިސްޓްރޭޓް ކޯޓުތަކުން ނިންމާފައިވެއެވެ.
