މެމްބަރު އަސްލަމް ސީއެންއެމް އަށް ވިދާޅުވީ، އިންޑި އާއި ރާއްޖެއާ ދެމެދު ސޮއިކޮށްފައިވާ އުތުރުތިލަފަޅު (ޔޫޓީއެފް) އެއްބަސްވުމާއި ހައިޑްރޯ ގްރަފީއާ ގުޅޭ އެއްބަސްވުމުގެ އިތުރުން ޑޯނިއާ އަދި ހެލިކޮޕްޓަރު ދުއްވާ ޕައިލެޓުން ތަމްރީނު ކުރުމަށް ހަދާފައިވާ އެއްބަސްވުމުގައިވެސް ކަންބޮޑުވާންޖެހޭ ރާއްޖޭގެ ސިޔާސަތައް ގެއްލުންވާ އެއްވެސް ކަމެއް ހިމެނިފައި ނުވާކަމަށެވެ. އަދި އެއެއްބަސްވުމަކީ ސިއްރު އެއްބަސްވުމެއްވެސް ނޫންކަމަށާއި އެއްބަސްވުންތަކުން ރާއްޖެއަށް ކުރާނީ ފައިދާ ކަމަށެވެ.
އަސްލަމް ވިދާޅުވީ، އޭގައި ރާއްޖޭގެ ސިޔާސަތައް ގެއްލުންވާފަދަ ކަންތައްތަކެއް އޮތްކަމަށް ބުނެ އިދިކޮޅުން ކުރަމުންދާ މަސައްކަތަކީ ފާޅުގައި ސަރުކާރަށް ޖައްސާލައިގެން އިންޑިއާ މެދުވެރިއަކަށް ލަައިގެން ހިންގާ ކަންކަން ކަމަށެވެ.
އަދި އެފަދަ ކަންކަމުން ރާއްޖެއަށް ފައިދާއެެއް ނުލިބި ކުރާނީ ދިގުދެމިގެންވާ ގެެެއްލުމެއްްކަމަށާއި، އިންޑިއާފަދަ ބޮޑު އިގްސޯދެއް އޮންނަ ތަނަކާއި ޖައްސާލައިގެން ކުރާކަންކަމަކީ އޭގެ ނަތީޖާ ފަހުން ވަރަށް ހިތިވެދާނެ ކަމެެއް ކަން އަސްލަމް ފާހަގަކުރެއްވިއެވެ.
ސަބަބަކަށް އަސްލަމް ފާހަގަކުރެެއްވީ ރާއްޖެއަށް ޒަމާނުންސުރެ ލިބެމުންދާ ހިލޭ އެހީތަކާއި، އެހީތެރިކަން މެދުކެނޑުމާއި، ބޮޑެތި މަޝްރޫއުތައް ހުއްޓިގެންދިއުމެވެ.
އަސްލަމް ވިދާޅުވީ އިންޑިއާއިން މިހާރުވެސް ރާއްޖެއަށް ގިނަގުނަ އެހީތެރިކަން ވެދެމުންދާކަމަށާއި، ބޮޑެތި މަޝްރޫއުތަކެއްވެސް ހިންގަމުންދާ ކަމަށެވެ. އެގޮތުން ރާއްޖޭގެ ކަނޑުގެ ސަރަހައްދު ބެލުމަށް އިންޑިއާއިން ވަމުން އަންނަ އެހީތެރިކަމާއި، ކޮވިޑްގެ ހާލަތުގައި ރާއްޖެއިން ވަމުންދާ އެހީތެރިކަމުގެ އިތުރުން ދެމުންދާ ހިލޭ އެހީތައްވެސް ފާހަގަކުރެއްވިއެވެ.
އުތުރުތިލަފަޅުގެ އެއްބަސްވުމުގެ އިތުރުން އިންޑިއާއާ އެކު ހަދާފައިވާ އިތުރު އެއްބަސްވުންތައް ހާމަކުރުމަށް އިދިކޮޅުން ގޮވާލަމުން ދިޔަ ދަނޑިވަޅެއްގައި އެ އެއްބަސްވުމުގެ ކޮޕީއެއް މަޖިލީހުގެ 241 ކޮމިޓީއަށް ހޯދުމަށް މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ހުށަޙެޅުއްވިއެވެ. އާދަމް ޝަރީފް މަޖިލީހުގައި އެދިފައިވަނީ އުތުރުތިލަފަޅު އެއްބަސްވުމާއި ހައިޑްރޮގްރަފީއާބެހޭ އެއްބަސްވުމާއި ޑޯނިއަރ މަތިންދާ ބޯޓާބެހޭ އެއްބަސްވުން ހޯދުމަށެވެ.
އެއަށްފަހު އެއެއްބަސްވުމާ ގުޅޭގޮތުން މައުލޫމާތު ސާފުކުރުމަށް، މިދިޔަ އޮކްޓޫބަރުގެ 24 ވަނަ ދުވަހު އާއްމުކޮށް ހުޅުވާލައިގެން 241 ކޮމިޓީން ކުރިއަށް ގެންދިޔަ އެ ކޮމިޓީގެ ބައްދަލުވުމުގައި އާއްމުކޮށް ފެންނަ ގޮތަށް ދައްކާފައިވަނީ ހަމައެކަނި އެ އެއްބަސްްވުމާ ބެހޭ ޕްރެޒެންޓޭޝަނެކެވެ. އެއްބަސްވުން ހިއްސާކޮށްފައިވަނީ ކޮމިޓީއާއެެވެ. އަދި ކޮމިޓީން އެދުވަހު ނިންމީ އެ އެއްބަސްވުމަކީ ސިއްރުކުރަން ޖެހޭ އެއްޗެއް ކަމަށް އެއްބަސްވުމުގެ މާާއްދާއެއްގައި ބުނާތީ، އެ ސިއްރު ހިފަހައްޓާށެވެ.
