މި ތުހުމަތު ރައީސް ޔާމީން ކުރައްވާފައިވަނީ އެމްއެމްޕީއާރްސީ މައްސަލާގައި ފަސް އަހަރުގެ ޖަލު ހުކުމެއް ތަންފީޒު ކުރައްވަމުންދަނިކޮށް، ދެ އަހަރު ފަހުން މިނިވަންވެވަޑައިގެންނެވުމާއި ގުޅިގެން އެމަނިކުފާނަށް މަރުހަބާ ދެންނެވުމަށް ރޭ އިދިކޮޅުން ބޭއްވި ޖަލްސާގައި ވާހަކަދައްކަވަމުންނެވެ.
ނޫސްވެރިކަމުގެ މިިނިވަންކަމާއި ބެހޭގޮތުން ވާހަކަދައްކަވަމުން ރައީސް ޔާމީން ވިދާޅުވީ، އެމަނިކުފާނު ހުކުމަކުން ސަލާމަތްވެވަޑައިގަތުމުން އެމަނިކުފާނާއިމެދު ހުކުމް ކުރަން ނޫސްތަކުން ފަށައިފި ކަމަށެވެ.
އެމަނިކުފާނުގެ ވެރިކަމުގައި މިނިވަންކަމާއިއެކު ނޫސްތައް ހިންގަން ޖާގަދިންކަމަށް ވިދާޅުވެ، ރައީސް ޔާމީން ވިދާޅުވީ، މި ސަރުކާރުގައި މިނިވަންކަމާއިއެކު ހިނގަނީ އޮންލައިން ނޫސްތައް އެކަނިކަމަށާއި، އެހެން ހުރިހާ ނޫސްތައް އޮތީ ސަރުކާރުގެ ޖީބުގައި ކަމަށެވެ.
“މިތާކު ނެތް މިނިވަންކަމެއް. މިތާކު ނެތް ފްރީޑަމް އޮފް އެކްސްޕްރެޝަނެއް. މިތާކު ނެތް މިނިވަން ޖާނަލިޒަމް އެއް. ދެން އެ ހުރިހާ ނޫސްތަކެއް އެތިބެނީ އިންޑިއާގެ މިތާ ހުންނަ އެމްބަސީން ފޮނުވާ ލާރިކޮޅު ނަގައިގެން. ނޫސްވެރިކަމުގެ މިނިވަންކަމެއް ރާއްޖެއަކު ނެތް” ރައީސް ޔާމީން ވިދާޅުވިއެެވެ.
ރައީސް ޔާމީން ވިދާޅުވީ، އިންޑިއާއަކީ ރާއްޖޭގެ އެންމެ ގާތް އަވަށްޓެރި ގައުމެއްކަމަށާއި، ނަމަވެސް ރާއްޖެއަކީ އިންޑިއާގެ ޓައުނެއްް ކަމަށް އެގައުމުން ގަބޫލުކޮށްގެން ނުވާނެ ކަމަށެވެ.
ބްލޮގަރު ރިލްވާންގެ މަރުގެ ތަހުގީގާއި، އަފްރާޝީމްގެ މަރު ތަހުގީކުރުމުގައި ތަފާތު ގެންގުޅޭކަން ފާހަގަކޮށްވެސް ރައީސް ޔާމީން ކުރި ދޮށިން ދީފައިވަނީ ނޫސްވެރިންނަށެވެ. އެގޮތުން އަފްރާޝީމްގެ މަރު، ރިލްވާންގެ މަރާއި އެއް ހަމައެއްގައި ތަހުގީގު ނުކުރަނީ ރިލްވާންއަކީ ރިޕޯޓަރަކަށް ވާތީތޯވެސް ވަނީ ސުވާލު އުފައްދާފައެވެ.
ރައީސް ޔާމީންގެ ވެރިކަމުގައި މިނިވަން ނޫސްވެެރިކަމެއް އޮތްކަމަށް ވިދާޅުވެ، ނޫސްވެރިންނަށް ތުހުމަތުތަކެއް ކުރިއިރު، ރާއްޖޭގައި ނޫސްވެރިން އެންމެ މިނިވަންކަން ދަށް ނޫސްވެރިކަމެއް ކުރީ ރައީސް ޔާމީންގެ ވެރިކަމުގައެވެ.
އެގޮތުން ރައީސް ޔާމީންގެ ވެރިކަމުގައި ސަރުކާރުގެ ޕްރެޝަރާއިއެކު 2016ވަނަ އަހަރު “ސީއެންއެމް”ހުއްޓާލަން ޖެހުނު ހަނދާނެއް ނުނެތެއެވެ.
އަދިވެސް އިތުރު ގިނަ ނޫސްތަކެއް ހުއްޓާލަން ޖެހުނެއެވެ. އެގޮތުން ދުވަހު ނޫސް ހަވީރު، އައްޑޫ ލައިވް، ދި ޓީވީ ހުއްޓާލަން ޖެހުނުއިރު، ބޮޑެތި އަދަދުތަކުން ޗެނަލުތައް ދިޔައީ ޖޫރިމަނާ ވެސް ކުރަމުންނެވެ.
އެކަންތައް ބޮޑުވެ، ނޫސްވެރިން މަގުމައްޗަށް ނިކުމެ މުޒާހަރާވެސް ކޮށްފައިވެއެވެ. އެތައް ނޫސްވެރިންނެއް ހައްޔަރުވެސް ކުރިއެވެ.
