ޝާހިދު އާއި އޭނާގެ ތަރުޖަމާން ޒިންމާދާރު ކުރުވުމަށް ނޫސްވެރިންގެ ކިބައިން ޝާހިދު އެދިވަޑައިގެންނެވީ އދ.ގެ އާއްމު މަޖިލީހުގެ ރިޔާސަތާ ޝާހިދު ހަވާލުވެވަޑައިގަތުމަށް ފަހު 100 ދުވަސް ފުރުމާ ދިމާކޮށް އެމަނިކުފާނު ނިއުޔޯކްގައި ބޭއްވި ނޫސްވެރިންގެ ބައްދަލުވުމުގަ އެވެ.
ނޫސްވެރިންގެ ބައްދަލުވުމުގައި ޝާހިދު ވިދާޅުވީ ނޫސްވެރިންގެ މަސައްކަތަކީ ކޮންމެހެން ބޭނުންތެރި މަސައްކަތެއް ކަމަށާއި އދ އިން ކުރާ ކަންތައް، ނޫނިއްޔާ ނުކުރާ ކަންތައް، ނޫސްވެރިން މުޅި ދުނިޔެއަށް ވިދާޅުވެދެއްވަން ޖެހިވަޑައިގަންވާނެ ކަމަށެވެ.
އދ.ގެ ކަންކަން ހާމަކުރުމުގައި ނޫސްވެރިންގެ އެހީތެރިކަން ބޭނުންވާކަމަށް ވިދާޅުވެ ޝާހިދު ވިދާޅުވީ އެމަނިކުފާނު އަބަދުވެސް ތެދުވާނީ، ސައްހަ، ވަކިފަރާތަކަށް ނުޖެހޭ ވާހަކަތައް ރިޕޯޓް ކުރުމުގެ ހައްގުގެ ދިފާއުގަ ކަމަށެވެ.
"އަޅުގަނޑު އެދެނީ ތިބޭފުޅުން އަޅުގަނޑުގެ ތަރުޖަމާނާއި އަޅުގަނޑު ޒިންމާދާރު ކުރުވުން. އަޅުގަނޑުގެ ލޮބުވެތި ރަޙްމަތްތެރިން. އެނގިވަޑައިގަންނަވާނެ، އަޅުގަނޑު އަބަދުވެސް ތެދުވާނީ، ޞައްޙަ، ވަކިފަރާތަކަށް ނުޖެހޭ ވާހަކަތައް ރިޕޯޓް ކުރުމުގެ ޙައްޤުގެ ދިފާއުގައި،" ޝާހިދު ވިދާޅުވި އެވެ.
ނޫސްވެރިންގެ އެ ބައްދަލުވުމުގައި ޝާހިދު ވިދާޅުވީ އޭނާ ވަޢުދުވީ، އުއްމީދުގެ ރިޔާސަތަކާއި ކޮވިޑު19ގެ ބަލިމަޑުކަމުން އަރައިގަނެ، ދެމެހެއްޓެނިވި ގޮތެއްގައި އަލުން ބިނާކުރުމުގެ މަސައްކަތް ކުރެއްވުމަށާއި އަދި ވެސް އެ ފަދަ މުހިންމު ކަންކަން ކުރެއްވުމަށް ކަމަށެވެ.
"އަޅުގަނޑު ވަރަށް ސާފުކޮށް ދަންނަވާލަން ބޭނުން ކޮވިޑް-19އިން އަޅުގަނޑުމެންނަށް އަރައިގަނެވެން އޮތްގޮތަކީ ހުރިހާ އެންމެންނަށް ކޮންމެ ތަނެއްގައި ހުރެގެން ވެސް ކާމިޔާބުކަމާއެކު ވެކްސިން ލިބޭނެކަން ކަށަވަރުކުރުން. އެންމެންނަށްވެސް ރައްކާތެރިކަން ކަށަވަރު ނުވާނަމަ އެއްވެސް މީހަކު ސަލާމަތެއް ނުވާނެ،" ރާއްޖޭގެ ފޮރިން މިނިސްޓަރުކަން ވެސް ކުރައްވަމުންެގެންދަވާ ޝާހިދު ވިދާޅުވި އެވެ.
