މުވައްޒަފުން ވަކި ކުރުމުގެ މައްސަލަ އާއި ގުޅިގެން ޖެންޑަރ މިނިސްޓްރީން ބުނީ، މުވައްޒަފުން ވަކިކުރަން ނިންމީ، ވިލިމާލޭގައި ހުންނަ ހިޔާގައި ތިބި ކުދިންގެ ތެރެއިން ގިނަ ކުދިންނެއް އަމާން ހިޔާއަށް ބަދަލުކުރުމާއެކު އެތަނުގެ މުވައްޒަފުން މަދު ކުރުމަށް ކަމަށެވެ.
މުވައްޒަފުން ވަޒީފާއިން ވަކި ކުރަން ނޯޓިސް ފޮނުވުމާއި ގުޅިގެން އެފަރާތްތަކުން ވަނީ އެމައްސަލަ ސިވިލް ސާވިސް ކޮމިޝަނަށް ހުށައަޅާފައެވެ. މި މައްސަލައާއި ގުޅިގެން ސީއެސްސީ އިން ވަނީ މުވައްޒަފުން ވަކި ކުރުމަށް ފޮނުވި ނޯޓިސް ބާތިލް ކުރުމަށް ޖެންޑަރ އަށް އަންގާފައެވެ.
ސީއެސްސީއިން މިކަމާއި ގުޅިގެން ބުނީ، ހިޔާގައި ތިބި މުވައްޒަފުން ވަޒީފާއިން ވަކިކުރުމުގެ ޕްރޮސެސްގެ އިޖުރާއަތްތައް ޖެންޑާރ މިނިސްޓްރީން އެންމެ ރަނގަޅަށް ފުރިހަމަކޮށްފައިނުވާ ކަމަށެވެ. އަދި އެ މުވައްޒަފުންނާއި ގުޅޭ ކަންކަން ދެން ކުރިއަށް ގެންދާނީ، އެކޮމިޝަނުން ކަމަށްވެސް ވަނީ ބުނެފައެވެ.
ވިލިމާލެ ކުޑަކުދިންގެ ހިޔާ ހުސްކުރަން ނިންމުމާ ގުޅިގެން އެތަނުގައި ތިބި 71 މުވައްޒަފުންނަށް މިނިސްޓްރީގެ އެކި އެކި ދިމާލުގައި މަސައްކަތް ކުރަން ފުރުސަތު ވަނީ ދީފައެވެ. އޭގެ ތެރެއިން 43 މުވައްޒަފެއްގެ ވަޒީފާ މިނިސްޓްރީގެ އެކި ތަންތަނަށް ވަނީ ބަދަލުކޮށްފައެވެ.
