މި ޑިސެމްބަރ މަހުގެ 22 ވަނަ ދުވަހު އެ ސެޝަން ކުރިއަށް ގެންގޮސްފައިވަނީ "ޒިންމާ"ގެ ނަމުގައެވެ.
މަޑިފުށި ޕޮލިހާއި ދިޔަމިގިލި ސްކޫލް ގުޅިގެން ކުރިއަށް ގެންދިޔަ އެ ސެޝަންގައި މައުލޫމާތު ދީފައިވަނީ އެ ސްކޫލްގެ ގްރޭޑް 8 އިން 10 އަށް ތައުލީމު ހާސިލުކުރަމުންދާ ދަރިވަރުންނަށެވެ.
މައުލޫމާތު ދިނުމުގެ އެ ސެޝަންގެ ތެރެއިން، ކުޅިވަރުގެ ހަރަކާތްތަކެއްވެސް ކުރިއަށް ގެންގޮސްފައިވެއެެވެ.
އެގޮތުން، ދިރިއުޅުމުގެ ހާލަތަށް ދަރިވަރުން ތައްޔާރުކުރުމާ އަދި ތިމާގެ އަމިއްލަ ނަފްސު ޒިިންމާދާރު ކުރެވިދާނެ ކަންކަމާ ގުޅޭގޮތުން މައުލޫމާތު ދީފައި ވެއެވެ. އަދި ކޮންމެ ދަރިވަރަކީވެސް ފަރުދީ ގޮތުން ޒިންމާއެއް އޮންނަ ދަރިވަރެއްކަމާއި، ހައްގުތަކާއި ޒިންމާއަކީ ކޮބައިކަން ދަރިވަރުންގެ އުމުރާ ގުޅޭގޮތަށް ބުނެދީފައި ވެއެވެ.
އަދި ދީނީ ގޮތުންނާއި، އިޖުތިމާއީ ގޮތުންނާ އަދި ގާނޫނީ ގޮތުން ދަރިވަރުންގެ ޒިންމާތަކާއި ހައްގުތަކަކީ ކޮބައިން ބުނެދީފައި ވެއެވެ.
އޭގެއިތުރުން، ވަގުތުގެ މުހިއްމުކަމާއި، ވަގުތުގެ ބޭނުން ހެޔޮގޮތުގައި ހިފާނެގޮތުގެ މައުލޫމާތު ހިއްސާކޮށްފައި ވެއެވެ. އަދި ދިރިއުޅުމުގައި ރަނގަޅު މަގު ހިޔާރު ކުރާނެ ގޮތާއި ނުރަނގަޅު ގޮތްތަކެއް އިހުތިޔާރު ކޮށްފިނަމަ އެކަމުގެ ސަބުން ކުރިމަގުގައި ދިމާވެދާނެ ނޭދެވޭ ކަންކަން ބުނެދީފައި ވެއެވެ.
