ރަތްމަންދޫ ގައި އެ މަސައްކަތް ފައްޓަވައިދެއްވާ އާ އިންޖީނުގޭގެ ބިންގާ އަޅުއްވައިދެއްވީ އެ ކުންފުނީގެ މެނޭޖިން ޑިރެކްޓަރު އަހުމަދު ސައީދާއި ދިއްގަރު ދާއިރާގެ މެންބަރު އިކްރާމް ހަސަންއާއި އެރަށު ކައުންސިލުގެ ރައީސް އިސްމާއީލް ނާހިދުއެވެ.
ފެނަކައިން ބުނީ މިއަދު ބިންގާ އެޅިގެންދިޔަ އިންޖީނުގޭގެ މަސައްކަތަކީވެސް ފަހެއް ނުވަތަ ހަ މަސް ދުވަހުގެ ތެރޭގައި ނިންމުމަށް ފެށުނު މަސައްކަތެއް ކަމަށެވެ.
ފެނަކައިގެ އެމްޑީ ސައީދު ސީއެންއެމް އަށް ވިދާޅުވީ، ސަރުކާރުން ރައީސް އިބްރާހިމް މުހައްމަދު ސޯލިހު ވެ ވަޑައިގެންނެވި ވައުދުފުޅުގެ މަސައްކަތް ދަނީ ކާމިޔާބު ކަމާއި އެކުގައި ކަމަށާއި މިހާރު މީހުން ދިރިއުޅޭ ހިސާބުތަކާ ދުރަށް އިންޖީނުގެތައް ބަދަލު ކުރުމަށް ކުރަމުންދާ މަސައްކަތުގެ 99 އިންސައްތަ ހާސިލްވެފައިވާ ކަމަށެވެ.
އިތުރަށް ވިދާޅުވީ، އިންޖީނުގެ ތަކުގެ އިތުރުން ފެނަކައިގެ އާ އޮފީސް އިމާރާތްތަކުގެ އިތުރުން ކުރިން ހިދުމަތް ދެމުން ދިޔަ ހިމަ ކޭބަލް ފަލަ ކޭބަލަށް ބަދަލު ކުރުމުގެ މަސައްކަތްވެސް ކުރެވެމުންދަނީ ފާހަގަކޮށްލެވޭ ސްޕީޑުގައި ކަމަށެވެ.
މަދު ރަށެއްގައި ނޫނީ އާ އިންޖީނުގޭގެ މަސައްކަތް ނުފެށި ހުރިކަން ފާހަގަކުރައްވަމުން ސައީދު ވިދާޅުވީ، މި ފެށޭ އަހަރުގެ ފުރަތަމަ ކުއާޓާގައި އެރަށްރަށުގެ މަސައްކަތްވެސް ފެށިގެންދާނެ ކަމަށާއި އަންނަ އަހަރުގެ ތެރޭގައި ރާއްޖޭގެ ހުރިހާ ރަށެއްގައި ހުންނާނީ އިންޖީނުގެތައް މީހުން ދިރިއުޅޭ ހިސާބުން ދުރުގައި ގާއިމުކުރެވިފައި ކަމަށެވެ.
ދިމާވި ބައެއް ދަތިތަކާއި އެކު މި އަހަރުގެ ތެރޭގައި އާ އިންޖީނު ގެތައް ޒަމާނީ ފެންވަރަށް ބަދަލުކޮށް އާ އިމާރާތް ނުހުޅުވުނު ނަމަވެސް އަންނަ އަހަރުގެ ފެށޭ ހިސާބުގައި އެ އިންޖީނުގެތައް ވެސް ހުޅުވިގެންދާނެ ކަމަށް ސައީދު ފާހަގަކުރެއްވިއެވެ.
މީގެ އިތުރުން މިހާރު ވެސް ބައެއް ރަށްރަށުގެ ފެނަކަ އާ އޮފީސްތައް ނިމިފައިވާ ކަމަށާއި ގިނަ އޮފީސްތަކުގެ މަސައްކަތް ވެސް ބާރު ސްޕީޑުގައި ކުރަމުންދާ ކަމަށް ވެސް އޭނާ ވިދާޅުވިއެވެ.
