މިކަމަށްޓަކައި ހދ. ކުޅުދުއްފުށި ސިޓީގައި ބޭއްވި ހާއްސަ ރަސްމިއްޔާތެއްގައި މި އޮންލައިން ފިހާރަ ހުޅުވައި ދެއްވީ، އެންވަޔަރަންމަންޓް މިނިސްޓަރު އާމިނަތު ޝައުނާއެވެ.
މި އޮންލައިން ފިހާރައިގެ އަމާޒަކީ ރާއްޖޭގެ އެކި ކަންކޮޅުތަކުގައި ތިބި އުފެއްދުންތެރިންނަށް ކޮވިޑުގެ ސަބަބުން އެފަރާތްތަކަށް ދިމާވެފައިވާ އިގްތިސާދީ ދަތިތަކުން އަރައިގަތުމަށް އެހީތެރިވެ ދިނުން ކަމަށާއި، ރާއްޖޭގެ އެކި ކަންކޮޅުތަކަށް އެފަރާތްތަކުން އުފައްދާ ތަކެތި ވިއްކުމުގައި އެހީތެރިކަން ފޯރުކޮށްދިނުން ކަމަށް މޯލްޑިވްސް ޕޯސްޓުން ބުނެ އެވެ.
އޮންލައިންކޮށް ތަކެތި ވިއްކުމުގެ އިތުރުން އެ ފަރާތްތަކުގެ ތަކެތި މާކެޓް ކޮށްދިނުމާއި ޕޯސްޓްގެ ނޭޝަންވައިޑް ޑެލިވަރީ ނިޒާމުގެ ތެރެއިން ވިއްކާ ތަކެތި ރާއްޖޭގެ އެކި ސަރަހައްދުތަކަށް ޓްރާންސްޕޯޓްކޮށް ޑެލިވަރީ ކޮށްދިނުމަށް ވެސް ހަމަޖެހިފައި ވާކަމަށް ޕޯސްޓުން ވަނީ ބުނެފައެވެ.
މިއީ އީ.ސޮލިއުޝަންސްގެ އެހީގައި، ޕޯސްޓުގެ ޑޮމެސްޓިކް އޮޕަރޭޝަންސް އަތޮޅުތެރެއަށް ފުޅާކުރުމަށް ކުރެވޭ މަސައްކަތްތަކަށް އެޅިގެންދާ މުހިންމު ބިންގަލަކަށް ވެގެންދާނެކަމަށްވެސް މޯލްޑިވްސް ޕޯސްޓުން ބުންޏެވެ.
އަލަށް ތައާރަފްކުރެވުނު ކޮމިއުނިޓީ އޮންލައިން ޝޮޕްގެ ހިދުމަތް ހުރިހާ އަތޮޅު ޕޯސްޓް އޮފީސްތަކެއްގައި އެއް ފަހަރާ ފެށިގެންދާނެ ކަމަށާއި އަދި އެހެނިހެން ރަށްތަކަށް މި ހިދުމަތް ފުޅާކުރުމަށް ކުރެވޭ މަސައްކަތްތައް ހުއްޓުމެއްނެތި ކުރިއަށް ގެންދެވޭނެ ކަމަށްވެސް އެކުންފުނިން ބުނެއެވެ.
